Assembly speaker Lalrinliana Sailo hoin nimin khan Mizoram sor­kar hotute'n Union Home secretary Ajay Kumar Bhalla chu New Del­hi-a a pisaah an kâwm a, Aizawl khawpui laili aṭanga Assam Rifles sawn chhuah dan tur leh thil pawi­mawh dangte an sawipui.
Inkawmhonaah hian Lalrinliana Sailo bak­ah, Rajya Sabha MP K Van­lalvena, OSD to CM Rosangzuala leh Home secretary H Lalengmawia te an tel a ni.
Lalrinliana Sailo chuan Dy. Chief Minister nen an inkawm ṭumin June, 2022 chhungin AR insawn chungchang sawiho turin MHA-in aiawh an rawn tirh tur thu a sawi laia an rawn tir leh si lo chu ṭha a tih loh thu Ajay Kumar hi hrilhin, "Hetiang ringawt chuan ṭhalaite'n MHA an rin loh phah dawn. Tin, state zawng zawngin MHA thu kan zah a, tinge AR lam hian an zawm ve duh loh," a ti. 
Mizoram sorkar hotute chuan, Assam Rifles insawn chhuahna tur thupek (order) chhuah a nih tawh hnuah tun thleng­in an la chhuah loh thu leh an chhuah ngei a ṭul tawh thu an sawi. Union Home Secretary chuan, Parliament mon­soon session zawh hnuah order thar chhuah a nih tur thu a lo hrilh niin sorkar thuchhuahin a tarlang. 
Mizoramin security related expenditure (SRE) a dawn ve ngai loh thu sawiin Mizoram sorkar hotute chuan, "Ram rálmuang nih man awm lo taka sorkar laipuiin SRE state ṭhenkhata a pek laia Mizoramin kan dawng ngai lo hi a dik lo a ni," an ti a; Ajay Kumar Bhalla chuan a lo en zui nghal tur thu a sawi. 
Mizoram sorkar hotute chuan, Mizoramah Myanmar ráltlân an pun zel thu leh an hamṭhatna tura sorkar laipui a in­hawn zau deuh a ṭul thu­te an thlen bawk a ni.