Minister-in AWC zirlai lawmna a hmanpui

Aizawl West College (AWC) chuan nimin khan Vanapa Hall-ah zirlai tharte lawmna, Freshers' Social an hmang a, Higher & Technical Education minister Dr R Lalthangliana'n a hmanpui.

Dr R Lalthangliana chuan, AWC chu Aizawla college upa ber zinga mi a nih thu a sawi a, "Thawktute'n zirlaite hmakhaw ngaia in indaih lohna phuhru tura zirtirtu rawih belhna atana thawhlawm in thawh khawm ṭhin hi a entawn tlak a ni," a ti.

AWC awmna hmun, Dawrpui Vengthar kawngpui kama mi chu hmun a chêp bakah, zirna boruak ṭha zawk a awm theih beisei avangin Luangmuala Commerce & Industries hmunah sawn tum a nih thu sawiin Minister chuan, "Engkim peih deuh vek tawh a ni a, rei lo têah a hmun tur tihfel a ni dawn a, hlawhtling tur chiang sa a ni," a ti a; NAAC assessment vawi lina an hmachhawn turah duhsakna hlânin, grade A an hmuh ngei theih nan ṭan la turin a chah.

R Lalthangliana chuan, zirtirtute chu Mizoram khua leh veng hrang hrang aṭanga zirlai kal khawmte enkawltu an nih avangin inbuatsaih ṭha turina chah a; zirlaite harsatna tawh leh dinhmun hrethiam taka zirtir turin a chah bawk.

AWC hi May 2, 1990-ah din a ni a, a tìr lamah chuan zan lamah zirna an kalpui ṭhin ani. March 9, 1992 khan NEHU hnuaiah pre-university course-ah lak luh a ni a, June 9, 1994 khan degree course hawn a ni. Department pariat awmin, principal leh zirtirtu 40-te'n zirlai 1,050 an enkawl mek a, history-ah post graduate zir theih a ni.

Freshers' Social-ah hian zirlai lut thar 498 lawm luh an ni a; zirna leh thil danga college tihmingṭhatute hnenah lawmpuina hlan a ni bawk.