Mi retheite nen inṭhen thei kan ni lo - Lalsawta

Mizoram Pradesh Congress Committee (MPCC) president Lal­sawta chuan nimin khan Congress Bhavan-a political session-ah thu sawiin, Congress party chu mi retheite nen inṭhen thei an nih loh thu leh sorkar sumte chu ren taka hman tur a nih thu a sawi.

MPCC President chuan, ram changkâng ber berah pawh mi rethei an awm a, mi retheite chu awm reng tur an nih thu sawiin, "Congress party hi engtik lai pawhin mi retheite nen inṭhen thei kan ni lo a, mi rethei zawkte ban phâkin kan awm reng tur a ni. Eng party pawhin sorkarna siam ila, mi rethei buaipui ngai an awm reng ang. Mi rethei zawkte'n khaw eng an hmuh theihna tur hian Pathian hruaina ringin kan thawk zel dawn a ni," a ti.

Lalsawta chuan, an president hlui Lal Than­hawla chu 9th Finance Commission member a ni tawh a, sorkar sum chungchang hre tak a nih thu sawiin, amah Finance minister a nih lai leh Planning Board-a H Liansailova awm laiin kum hnih chhung ram sum leh pai dinhmun sawhngheh kum, Year of Consolidation-ah an puan thu a sawi.

Sorkar sum ren thei ang berin an hmang a, Mizoram sum dinhmun an ti ṭha hman viau tih sawiin Lalsawta chuan, "Pawisa hi ren taka a hmanna tur dik taka hman tur a ni a, kan hmanna chu mipui tan a ṭangkai em tih leh mipui rethei ber berte'n an ṭangkaipui em tih hi a pawimawh. Hmanhmawhthlak leh hmanhmawkthlak lutuk lo a awm a, mi an dam loh chuan an inenkawlna a hmanhmawhthlak a, airport chei chu a pawimawh rualin hriselna lama hmalakna su buai khawpa hmalak hmasakna atana hman tur a ni lo," a ti.

Congress President chuan, sum leh pai enkawlah a uikawm avangin sum an hnutchhiah ṭeuh tih sawiin, "MNF-in ren lo taka hmang zui hiau hiau angin an sawi ṭhin a, a dik chiah lo. Dan anga kal a ngai a, DPR fel taka siam a ngai a, administrative approval leh ṭul dang tam tak a awm bawk. Dan kalha chêt a rem loh avangin sum hman hman loh kan nei nual a ni," a ti a; sum hman bàn eng emaw zat a awm lo thei lo tih a sawi a ni.