Khua/venga ruihhlo dotu tur din

State Level Working Committee on Ruihhlo Do chu nimin khan an chairman Dr K Beichhua, Social Welfare minister hoin Secretariat conference hall-ah an ṭhukhawm a; khua leh venga ruihhlo dotu tur din a nih thu tarlan a ni.

Dr K Beichhua chuan, "Mizorama ruihhlo hluar mek do lêtna atan beihpui thlak a pawimawh. Chief Minister kaihhruaina hnuaiah State Level Core Committee on Ruihhlo Do din a ni a, chumi hnuaiah chuan State Working Committee din a ni. District leh local/village task force pawh siam a ni a, peih a ni tawh," a ti a; mi a tam thei bera inhnamhnawih theih tura ruahman tum a nih thu a sawi.

Mizoram puma ruihhlo do bul ṭan nan budget-a nuai 300 ruahman a nih thu leh Chief Minister-in a pawmpui tawh thu sawiin K Beichhua chuan, "Sumte hi a ṭul dan angin border area leh ruihhlo a hluarna lamah hman tam zual a ni ang," a ti.

Ṭhutkhawmah hian ruihhlo ṭhat lohzia zirtirna mass media campaign a tam thei ber kalpui an rél a; August chawlhkar thumna velah State Level Core Committee on Ruihhlo Do chairman, Zoramthanga, CM hawntir tum a ni.

Working Committee on Ruihhlo Do-ah hian sorkar department hrang hrang aiawhte bakah, MJA, Central YMA, MZP leh MSU aiawhte an tel a ni.