MNF sorkarin manifesto tihhlawhtlin Tam tak an nei tawh - Lalruatkima

MNF adviser Lalruatkima, minister of state chuan, MNF sorkarin an manifesto tihhlawhtlin tam tak an nei tawh nia sawiin, chu chu mipuiin sorkar teh nan hmang se a duh thu a sawi.

Lalruatkima hian nimin khan Mizo Hnam Rûna inkhawmah thu sawiin, Mizorama hmasawnna lian tham leh rotling zawng zawng deuhthaw chu MNF thawh niin a sawi a, "Manifesto tihhlawhtlin tam tak kan nei tawh a, hei hi mipui náwlpuiin min teh nan hmang se a ṭha hle," a ti.

Pathianin MNF hruaitute a ensan ngai lo a, a hun takah huaisenna a pe ṭhin nia sawiin Ruatkima chuan, "MNF chu ṭawng tam lo, thawk tam kan ni. Zu chhiah aṭanga hausak ai chuan retheih deuh zawk kan thlang," a ti a; an manifesto angin ei leh bàr, gas leh tuialhthei chungchang te, zirna leh thil dangahte a ṭha zawnga thil inthlâkthleng an hmu zel niin a sawi.

MNF Adviser chuan, Mizoram chu chênna tlâka siam zel turin MNF-in theihtawp a chhuah nia sawiin, "Ṭhalaite tana kan hmathlir leh eizawnna chungchanga kan hmalakna hmutute tan MNF vote a chakawm hle ang," a ti.

Lalruatkima chuan, Congress sorkar laiin sum a harsa hle nia sawiin, "A lu nunga cheng 50,000 chuang min battirtute hian sum enkawl thiam loa min puhna hi inen lêt nan hmang se a ṭha ang... MADC sorkar siam tura party thuchhuak kalha inrawlh an MLA leh member-te chungah action an la ngam tur a ni," a ti. ZPM-te chu pahnihna nihah an lâwm tâwk em em zel niin a sawi bawk.