Ram enkawltu thlan fuh loh chuan Mipui an rethei reng dawn - BJP President

BJP, Mizoram Pradesh president Vanlalhmuaka chuan nimin khan an party pisaa inkhawmah thu sawiin, Mizoram enkawltu tur thlante an fuh loh chuan mipui an rethei reng mai dawn tih a sawi.

Vanlalhmuaka chuan, roreltu atana political party ṭha lo thlan a niha tuar nasa bertu chu mirethei, eichawp zawngte an nih thu sawiin, "Politics hi miretheite hian kan ngaihtuaha kan vei tak tak a ngai tak zet. Mizoram enkawl tura kan thlante an fuh loh chuan kan rethei hle reng mai dawn a ni," a ti a; sorkar sum neih loh tuartu ber chu mirethei eichawp zawngte an nih thu a sawi a ni.

Vanlalhhmuaka chuan, Mizoram chu corruption-in a phuar nghet tlat tawh nia sawiin, "A chhu chat tur leh chhu chat ngam awm chhun chu BJP-te hi kan ni. Mizorama corruption kan do dan anga ACB leh Lokayukta maiah duh tâwk loin, CBI thlengin corruption tihtawpna atan koh luh dawn a ni. Kan sorkar hunah chuan corruption tite an zalen dawn lo," a ti.