KHAWTHLIR

Hnam puanzar zár turin ngen
Mizoram sorkar chuan, kumin Independence Day-ah mahni inah hnam puanzar (national flag) zár ṭheuh turin mi tin a ngen. Mimal in tina hnam puanzar zar hi India zalenna champha vawi 75-na puala sorkar laipuiin a ruahman a ni a, national flag hi khua/veng tina retailer-ah Rs 20-a lei theih a ni.

Thisen pe
IKK Ṭhalai Pawl, Bualpui NG Bial chuan nimin khan Siaha District Hospital tan thisen unit 40 an pe a, petute mipa 34 leh hmeichhia paruk an ni. Vairengte Field Veng Branch YMA pawhin an YMA Rûnah Kolasib District Hospital tan thisen unit 29 an pe a, petute mipa 23 leh hmeichhia paruk an ni. Serchhip College NSS leh Red Ribbon Club huaihawtin zirlaite'n Serchhip District Hospital-ah unit 37 an pe bawk.

Thutthleng hlân
MLA Dr Vanlalthlana chuan nimin khan a bial Aizawl North-II chhunga Ramhlun South community hall-ah a biala anganwadi centre 16 hnenah ṭhutthleng 20 ṭheuh a hlân a; thu sawiin, "Zirna leh hriselna buaipui hi a bulṭhut aṭanga kan siamṭhat a ngai a ni," a ti.

Mega kiosk sawn
Health & Family Welfare department chuan RAT hmanga Covid-19 sample endikna mega kiosk atana hman chu Old MLA Hostel aṭangin Health Services building, Dinthar Vengah a sawn. Thawhṭanni aṭanga Zirtawpni inkarah chawhma dar 10 aṭanga tlai dar 4 thleng swab sample endiktir theih a ni a, Inrinni leh pisa chawlh ni-ah chuan chhun dar 12 thleng hawn a ni.

Lirthei chesualah mi pakhat a thi
Nimin tlai dar 3:30 vel khan Power & Electricity department mi jungle clearance ti tura thawk chhuakte chu pick-up hmangin Lawipui thlanmual kawngah an chesual a, Lalrinpuia, Melriat khua chu a hliam tuar loin a thi. Lirtheiah hian mi panga an chuang a, hliam pakhat Lalrintluanga chu damdawi-in panpui a ni a, mi dangte erawh chu an hliam na lo thung.

Champha lâwm
Mizoram Law College Alumni Association chuan nimin khan college din champha an lawm a, an chairman C Lalramzauva, adviser to CM-in a hmanpui. Zirlaite tan career awareness programme an buatsaih nghal bawk. Govt. Mizoram Law College hi Mizorama law zirna College neih chhun niin law college pahnih - Liandingpuia Law College leh Aizawl Law College te chhunfin a, July ni 1, 2004 a din a ni.

Hnathawh enfiah
AMC Ward-III councillor C Lalchhandami chuan nimin zing khan kum 2021-22 Property Tax return Rs 1,60,000 hmanga Ramhlun North Local Council House chei thar a tlawh. Councillor chuan, hnathawh a ṭha viaua a hriat thu a sawi a, "LC house-te hi party mal bik a ni lo a, khawtlang rorelna changtu apiangte'n an ta anga ṭha taka an enkawl zui a ngai," a ti.