Assembly inthlana hma la tur pawl thar Zoram Exodus Movement a ding

Mizoram Assembly inthlan kaihhnawiha hma la tura pawl din thar, Zoram Exodus Movement (ZEM) chuan June 24, Inrinni khan Aizawl Press Club-ah an thil tum leh hmalak dan turte an puang.

ZEM dinnaa a bul tumtute zinga mi Rev.Dr K Thanzauva chuan, media hrang hranga mipui ṭhahnemngaihna au aw-in a ko chhuak tih sawiin, Mizoram tana tih theih an neihte sawihoin vawi tam tak an inhmukhawm ṭhin a, mipui leh media-te nen ṭang tlangin Mizoramah sorkar ṭha tun din a nih theih an beisei thu a sawi.

Mizoramah sorkar ṭha a pian theih nan thawhhona tur huang a awm a, inzirtirna movement siam phawt chu bul ṭan dan tur nia an hriat thu sawiin K Thanzauva chuan, "ZEM-in a tum chu, Sustainable Developed Mizoram (Ram leh hnam hmasawnna) din tura sorkar ṭha siam a ni," a ti.

ZEM hian Steering Committee an siam a, chuta mawhphur lailâwk tura an ruatte chu - Rev.Dr K Thanzauva, K Sapdanga, F Rodingliana, B Lalchhanzova leh Dr Van­lalthlana te an ni.

A hnuah Val Upa chan chang turin - F Lalremsiama (IPS Rtd.), Lalfakzuala (IAS Rtd.), Bualhranga, Lalliansawta, JH Pahlira leh Rev.Dr K Thanzauva te an ruat bawk.

Rev.Dr K Thanzauva chuan, ZEM chu Val Upate uapna hnuaiah Sustainable Developed Mizoram din tura sorkar ṭha siam duhtu zawng zawng huang khata awm khawm dan daptu tur a ni tih a sawi a, "Kum 2018 Assembly inthlan hunah pawh sorkar ṭha a pian theihna tura inthlan hmachhawn dan kawng ngaihtuah tura beisei a ni," a ti.

Zawhna chhangin K Sapdanga chuan, movement siam an tum tih sawiin, "Non Congress, non MNF tih ang hi kan rilruah a awm lo. Eng mi pawh, Zoram ṭha zawk neih duhna rilru puttir kan tum a ni," a ti a; sorkar ṭha din chu inthlanna hmanga neih chi a nih avangin, Assembly inthlana an chuh dawn leh dawn loh chu hunin a la hril tur thu a sawi.

K Sapdanga chuan, movement siam tura hmalakna turah, zin chhuah a ṭulna hmun a piangah an kal tur thu a sawi a, "Party angin emaw, mimal angin emaw, kan thuthlung min ṭâwmpui thei apiang kan pawm," a ti.

Vap Upate zinga mi F Lalremsiama chuan, ZEM Val Upate chu an upa tawh tih sawiin, "Keini chu engmah kan ni lo a, engmah kan beisei lo. Ṭhalaite rawn pen chhuak se kan duh a ni," a ti a; Mizoram leh Mizo mipui huapzo sorkar awm se an duh ber tih a sawi.

Zawhna chhangin Rev. Dr K Thanzauva chuan, political party anga khaw tin leh veng tina unit din ang chi chu an tum dan a nih loh thu a sawi a, "Unit hian kan rilru a la lutuk lo. Unit hian kan political system hi a tichhe zawkin kan hria," a ti.