Tlabungah doctor pahnih dah turin ngen

Tlabung Progressive Society (TPS) chuan, June 24, Inrinni khan thuchhuah siamin, Tlabung damdawi-inah medical doctor pahnih tal dah turin sorkar an ngen.

TPS chuan, Mizorama doctor indaih lohna zualpui phuhrûkna tura sorkarin doctor 26 a la thar ta chu lawm­awm an tih thu sawiin, "Hun rei tak doctor nei mumal tawh lo thingtlang khaw tam tak tan a lâwmawm lehzual," an ti a; doctor 26 lak thar a nih avangin Tlabung damdawi-inah doctor pahnih tal dah turin sorkar an ngen a ni.

TPS tarlan danin, Tla­bung damdawi-in hi kum 1872-a din, Mizorama dam­dawi-in upa ber a ni a, tunah hian khum 30 awmin, doctor pakhatin a enkawl a; Tlabung leh a chhehvela khaw 30 chuanga mi 30,000 chuangte'n damdawi-in pan tur an neih awmchhun a ni.

TPS chuan, Mizoram hmun hrang hranga general hospital-ah doctor pakhatin khum 5-7 vel an enkawl tlang­pui laiin, Tlabungah chuan doctor pakhatin khum 30 a enkawl tih an sawi a; Tlabung leh a chhehvel chu sikserh hluarna hmun a la nih avangin, doctor mamawhna a sang zual hle tih an tarlang.

TPS tarlan danin, Tlabung damdawi-inah hian kum 2007 aṭanga 2012 thleng vel khan doctor 4-5 an nei ṭhin a; thlaktu tur awm loa an doctor-te sawn chhuah an nih ṭhin avangin kum 2012 aṭangin doctor pahnih an nei a, kum 2015 aṭang chuan doctor pakhat chiah an nei tawh a ni.