Hri leng vangin Champhaiah Vawk 80 vel an thi tawh
Kumin June thla tîr aṭang khan Champhaiah vawk hri a lêng a, hei vang hian vawk 80 vel a thi tawh nia thu dawn a ni.
Champhai District Vawk Vulh Association hruaitute sawi danin, tunlaia Champhaia vawk hri lêng vanga vawk thi zat chu an member-te an inzawh chian hnuah June 23 thleng khan vawk 79 a thi tawh a ni.
Vawk hri lêng chungchangah hian Champhai District Vawk Vulh Association member-te chu June 23 khan an president Lalmuanpuia Sailo kaihhruaiin Champhai Venglai community hall-ah an ṭhukhawm a; Champhai DC-in Myanmar aṭanga vawk leh ár lak luh khapna thupek a chhuah chu an thlawp thu leh, khauh taka kenkawh an duh thu te, thupek zâwm lote chunga dan anga hmalak an tum thu an tarlang.
AH&Vety department chuan Champhaia vawk hri lêng chu a hmuna enfiah turin June 23 khan Aizawl aṭangin vety doctor pathum - Dr Esther Zoliani, Dr Neihthangpuii leh Dr Zohmingthangi an tír a; anni hian vawk thite chu eng hri vanga thi nge tih hriat theih nan vawk thisen leh a sa them an la a ni.
Champhaia vawk hri leng hi AH&Vety-in an endiknaah chuan, Mizorama vawk hri lêng ṭhin swine fever niin an hria a, PRRS vei a awm leh awm loh hre turin Selesiha Vety College laboratory-ah a sample an thawn tawh a ni.