Aizawl-Lunglei WB kawng tlang lo

Aizawl-Lunglei World Bank kawngpui chu June 23, Zirtawpni zan dar 9 vela Ṭhiak khaw daia lei minin a hnawh ping a, nimin thleng khan lirthei kaltlang theiha thenfai a la ni lo.

Ṭhiak YMA hruaitute hnen aṭanga thu dawn danin, lei minna hi Hor­ticulture 'Centre of Exce­llence' zâwnah a ni a, kawng chhak lam aṭanga lei tawlhin kawngpui meter 200 vela thui a hnawh a ni. Lei tawlh then hna hi June 24 zing aṭangin thawh ni mah se, kawng thlanga lei hnawl thlak theih a nih loh avangin hmun dangah paih a ngai a; hei vang hian kawng titlang tur hian chawlhkar khat vel pawh a ngai thei niin an sawi.

Ṭhiak YMA hruaitute chuan, an khaw daia kawng ping chu maxicab/pick-up leh a aia tê lirthei tan Ṭhiak khaw chhungah hêl theih a nih thu an sawi a; LMV aia lian lirtheite erawh chu khaw chhunga tlan luh phal a nih loh avangin, kal tlang tum lui lo turin an ngen a ni.

PWD hotute sawi dan­in, NH-54 Aizawl-Seling-Chhingchhip kawng­pui chu lirthei chi tin kal theiha siam tlang a ni tawh a; Tuirial bula lei tla­hniam leh Chhingchhip Mual­puia kawng chhuat bal laia thir lei (bailey bridge)-a tlân luhna laia lei chhùnte erawh chu a nàl deuh avangin kal a harsa deuh niin an sawi.