Doctor-te'n May thla chhung Inkhârkhip zel an duh

Doctor pawl pahnihte chuan, Mizorama inkhârkhip a nih chhungin nungchang leh khawsa zia pawimawh tak tak mipuite'n an zir mek zel tih sawiin, "Tun dinhmunah lockdown hi la hlih mai a him lo niin kan hria a, chuvangin, May thla chhung tal chu lockdown la chhunzawm ni se," an ti.

IMA leh MGDA chuan, state páwn aṭanga Mizorama lut tur zawng zawng chu uniform guidelines (kaihhruaina inang tláng) hmangin Covid-19 scree­ning tih vek ṭha an ti a, "Kan ramri, a bikin international bor­der area-a duty/check point pawimawhahte screening facility awm thei ngei se," an ti a; screening ti turin medical lama thawkte ringawt chu an indaih dawn loh avangin, sorkar department dang - force/police, zirtirtu leh mi dang remchangte hman dan ngaihtuah ṭha an tih thu an tarlang.

Inkhàrkhip chhunzawm an duh chhan zawhna chhangin IMA Mizoram Branch president Dr Rosangluaia chuan, "Ram chhungah chuan kan himin kan inhria a ni thei a, state hrang hrangah erawh chuan Covid-19 kai an pung zel. Chu bakah, state hrang hrang aṭangin an rawn haw dawn a, Covid-19 kai hmuh loh palh a awm theih avangin inkhàrkhip chhunzawm ṭha kan ti a ni," a ti.

Dr Rosangluaia chuan, medical lam aṭanga thlir chuan khauh taka inkhàr­khip chu an duh dan ber a nih thu sawiin, "Mahse, sorkarin eco­nomy a ngaihtuah ve a ngai a, chumi thlirpui chung chuan inkhàrkhip dan turah rawtna kan siam a ni. Dawrte chu chhûn lamah chuan hawn phal ni se, a inhawng thei chin erawh sorkar­in bituk se kan duh," a ti a, puipunna lam thil chu khap tlat zel an la duh thu a sawi.

Mizoram páwn aṭanga rawn hawte ni 14 chhung khung hran an nih hnua kai an awm lo a nih chuan Mizoram chu 99%-a himah ngaih theih a nih tur thu sawiin IMA President chuan, "100%-in kan him erawh a tih theih loh ang. State páwn aṭanga rawn haw an kai loh chuan a kai thei awm­chhun chu Covid-19 kai enkawltute an ni a, an him rih. Kan ramri erawh khauh taka kan vèn chhunzawm zel a pawimawh," a ti.

Quarantine chungchanga zawhna chhangin Dr Rosangluaia chuan, "Duhthusam chuan mi pakhat room pakhata dah zel nise. Mah se, hetiang hian hmun dangah pawh an ti thei bik lo. Room khatah tam deuh dah loin, khum pawh ft. 6 dan tala dah a ṭha," a ti a, inthiarna pawh a tlem thei ang berin in hman ṭawm thei se duhthusam a nih thu a sawi.

•    May 2020 chhung inkhàrkhip zel

•    Zan dar 7 - zing dar 5 curfew

•    Vantlang leh pisa hmun pawi­mawh luhna tinah kut silfaina awm se, a remchan lohna hmun­ah chuan hand sanitiser tal chhawp ni se.

•    Vantlang hmuna chhuak reng rengin hmai tuamna hman vek ni se.

•    Chil chhâk khap mek khauh lehzuala kenkawh ni se.

•    Mipui punkhawm - khawtlang leh kohhran bakah, chhiat ni ṭhat ni-ahte la insûm zel rih nise. Kawng kal dan (pedestrian traffic flow) pawh mumal taka kalphung kan neih theih nan inzirtir a ṭul kan ti.

•    Damlo enkawl, kan leh tlawh chungchangah 'One patient, one attendant' kalphung te, inkan hun khauh taka ken­kawh te, damlo enkawltu leh tlawhtute'n hmai tuamna hman vekte a pawimawh a, inzirtir nasat ni se.

•    Mipui him zawkna tura invenna leh inven dan kan neihte mi zawng zawngin inang tlang taka kan hman theih nan sorkarin mipui zirtirna tur IEC lam regular taka siamin chhuah ṭhin se kan ti.

•    State páwn aṭanga lo lut reng reng quarantine dan tura sorkar ruahmanna ṭha kan ti a, home quarantine hi loh theih loh tih lohah chuan tih loh ni se, quarantine facility hi medical monitoring a awlsam zawk avangin tih vek theih ni se. Quarantine tur reng reng sorkar guidelines angin Covid screening test neih vek ni se.

•    Covid vanga thi emaw, kai rin­hlelh emaw thite ruang sâwngbàwl danah, Health department, Central YMA leh kohhran lamin ruahmanna an siam hi ṭha kan ti. Covid-19 vanga damdawi-ina thite sawngbawl dan chu kaihhruaina awm sa a ni a, in lama thite chu body bag-ah dah ni thei se, a buaipuitute'n PPE hmang ngei thei se, body bag-a dah hnua buaipuitute tan erawh hmai tuamna leh kutkawr hman a tâwk kan ti. Ruang chûl, khawih leh hrûkte tih loh a ṭha ber.