Smart City sum a ṭha thei ang bera Hman ṭangkai a ni ang - UDPA Minister

UDPA minister Zodintluanga chuan, Smart City hnuaia Aizawl khawpui tihhmasawnna tura sum lo kal tur, cheng vbc. 500 chu a ṭha thei ang bera hman ṭangkai a nih tur thu a sawi.

Media-te'n an kawmnaah Zodintluanga chuan, Smart City-a Aizawl thlan a ni ve ta chu lawmawm a tih thu sawiin, UDPA department-a thawkte thawhrimna rah a nih thu a sawi a; "Smart City thlanna hmasa zawkah Aizawl khawpui chu point khatin a tling lo a, tling lo chiah chiahin ṭum hnih a lo awm tawh. Tuna Aizawl thlan a ni ve ta hi Aizawl chauh ni lo, Mizo mipui zawng zawng an lawm ve ka ring a, sorkar pawh a lawm hle a ni," a ti.

Zodintluanga chuan, Smart City project-in scheme hrang hrang - mipui hriselna, khawpui cheimawi leh tihhmasawnna tur tam tak a keng tel tih sawiin, chungte chu khawpui leh a chhunga mipuiin hma an sawn theihna atana hman chu mipuite leh sorkar duh dan a nih thu a sawi a; sum lo kal turte chu a ṭha thei ang bera hman ṭangkai tum a nih thu a sawi a ni.

Sorkar laipuia Urban Development leh Housing & Urban Poverty Allevation minister M Venkaiah Naidu-a'n June 23, 2017-a Smart City 30-a tel tur khawpui 30 a puan zingah Aizawl telh a ni a, hmarchhak state aṭangin Gangtok (Sikkim) leh Pasighat (Arunachal Pradesh)-te an tel bawk.

Smart City hnuaiah hian khawpui 100 telh tum a ni a, June 23-a puan thar leh takte nen khawpui 90 thlan a ni tawh a; hmun ruak 10 la awm chu state 20-in an inchuh leh dawn a ni.