MSU-in cement rate an tarlan leh lakuhna rate a insan hleih - MCIRZA

Mizoram Cement and Iron Rod Zuar Association (MCIRZA) chuan thu-chhuah siamin, MSU-te'n an thuchhuaha cement lakna rate an ziah lan chu dealer-te'n commission and forwarding agent (C&F) hnuaia an lakna nen a inan loh thu an tarlang.

MSU-in cement rate an tarlan chu C&F hnuai-a an lakna rate nen a insan hleih hle nia sawiin MCIRZA chuan, "Taxation department leh dealer hrang hrangte hnenah tax invoice en theih reng a ni," a ti a; MSU leh cement company-te inkarah inremna a awm theih loh vanga mipuite'n harsatna an tâwk chu pawi an tih thu an sawi.

MCIRZA chuan, MSU-in Taj Cement bag khat Rs. 360-a hralh chhuah theih turin an tarlang nia sawiin, "Hei hi thu belhchian dâwl lo a ni. MSU-in company dang zawng zawng a dan hnuah Taj Cement hi Rs. 400 chung lama zawrh vek a ni," an ti.

Cement zuarte'n a tláwm thei ang bera hralh chu an duh ber a nih thu sawiin MCIRZA chuan, "Mizoramin kan cement mamawh ang hi company pakhat chauh chuan mi phuhrûk zo lo," an ti a; sorkar chu a rang thei ang bera cement zuara eizawngte harsatna chinfelsak turin an ngen a ni.