Winery & wine siam khap chungin Grape wine siam chungchangah END-in sorkar policy a nghâk mek

Excise & Narcotics depart­ment (END) chuan, Champhai leh Hnahlana winery-a grape wine siam endik te, tihtawp tumna leh grape wine siamtute man tumna a awm leh awm loh chungchangah sorkar policy nghah mek a nih thu an tarlang. Hetih lai hian, MLP Act 2019-ah chuan, grape wine siam chhuah leh a siamna hmun (winery) din khap a ni.

END-ah hian RTI Act hmangin, Champhai leh Hnahlana winery-ah grape wine siam mek a nih thu leh wine siamna tur grape an lei mek thu END-in a hriat leh hriat loh te, winery pahnih leh winery-a wine siam tihtawp tumna leh wine siamtute man tum a nih leh nih lohte zawh a ni a; END SPIO chuan August 1, 2022 khan chhanna pe chhuakin, "He mi atan hian sorkar policy nghah mek a ni," a ti.

Champhai leh Hnahlana winery leh grape wine an siam chhuahte END-in endik a tum leh tum lohte zawhna chu END SPIO chuan, "Sorkar policy azira hmalak a ni ang," tiin a chháng bawk.

Hetih lai hian, END chuan RTI Act hmanga zawhna an lo chhan tawhnaah, Champhai leh Hnahlana grape wine siamte chu The Mizoram Liquor (Prohibition) Act, 2019 (MLP Act)-in a khap zinga mi a nih thu an lo tarlang tawh thung.

MLP Act, 2019 Chapter-III chhunga Section 5(1)(e)-ah chuan, zu leh a kaihhnawih thil hrang hrang - brewery, distillery, winery, bottling plant/warehouse emaw, chutiang hmun dina zu leh a kaihhnawih thil rêng rêng siam phal a nih loh thu a chuang.

"Mizorama kohhran ṭhen­khatin sakramen (sacramental wine) atana an hman wine-te hi END-in endik/ enfiah in tum em? Endik/ enfiah tum lo ni ta u la, endik/ enfiah in tum loh chhan eng nge?" tia zawh a ni bawk a; END chuan, "Sorkar policy azira hmalak a ni ang," tiin a chhang a ni.

Hetih lai hian, RTI Act hmang veka zawhna END-in an lo chhàn tawhnaah, Mizorama kohhran ṭhenkhatin sakramen atana wine (grape wine) an hman chu en zui tumna a awm rih loh thuin an lo chháng tawh thung.