Kawngpui chhe lutuk avangin Mamit maxicab-te an chàwl rih
Mamit kawng, Mamit leh Dapchhuah inkar kawngpui chhe lutuk avangin Mamita maxicab-te chu August 5, 2022 aṭang khan an tlân duh lo a, kawng chhia a ziaawm hma chuan tlân tawh rih loh an tum.
Tlân tawh rih loh an tum chungchangah hian Mamit Maxicab Welfare chuan August 5, 2022 khan thuchhuah an siam a, "August 5, 2022 aṭang hian Mamit leh Aizawl inkar maxicab service zawng zawngte kawng chhe lutuk avangin service tawh rih loh mai ni se tiin kan rél a. Kawng a ziaawm veleh service chhunzawm leh a ni ang," an ti.
Mamit Maxicab Welfare chuan kawng chhiat avanga an chawlh chhunga mipuiin harsatna an tawh theih leh mipui mamawhna hre rengin, kawng ṭhat veleh tlan ṭan leh nghal an tum thu an sawi a; an harsatna tawh hrethiam a, ngaithiam turin mipui an ngen a ni.
Mamit aṭanga thu dawn danin, ruahsur avangin Mamit panna kawngpui, NH-108 a min nasa a, Mamit leh Dâpchhuah khaw inkar kawng a min nasa zual. Dàmpui hêlna kawng (diversion road) chu June 19, 2022 aṭangin lirthei kal theihin a tlang tawh lo a, Dampui leh Mamit inkar kawng thar pawh August 3, 2022 aṭangin leimin avangin a tlang tawh lo bawk.
Kawng thar a tlang loh avang hian kawng hlui, hluihlâwn tawh, kum eng emaw zat hman tawh loh chu zawh a ngai a, kawng hluihlâwn tawh a nih avangin a khuar chhe nasa hle a; lirthei tê chi tan kal hleih theih a ni tawh lo.
Mamit maxicab-te pawhin harsatna an tâwk nasa a, lirthei tanky tauh pawp leh lirthei chhiat phahte a awm ṭhin avangin Mamit maxicab neitute chuan kawng a ziaawm hma chuan tlan tawh rih loh an rél a ni.