Aizawla YMA branch hruaitute'n CYMA hnuaiah ruihhlo do ṭha an ti

Central YMA chuan August 5, 2022 (Zirtawpni) zan khan Vanapa Hall-ah Aizawla YMA branch office bearer-te an ko khawm a, thupui pahnih - YMA kalphung leh ram leh hnam humhalh nan ruihhlo do chungchang an inhrilhfiah. YMA branch hruaitute chuan, CYMA hnuaiah ruihhlo do ṭha an tih thu an sawi hlawm.

Intawhkhawm hi CYMA president R Lal­ngheta'n a kaihruai a, Aizawla YMA branch 108 zinga branch 97 aṭanga kal office bearer-te bakah, YMA CEC member-te nen mi 440 an tel.

CYMA vice president Lalhmachhuana'n 'Ram leh hnam humhalh nan ruihhlo do' tih thupui sawiin, "Kan ram, kan hnam hi kan vanduai a, international boundary vên hneh si loh thui tak mai, inkalpawh awlsam em em si kan nei. Ruihhlo leh dan loa sumdawnna tawlh rûkna kalkawng kan ni a, hnam tlem leh naupang tê kan ni a, ruihhlo ngai kan tam lutuk hi a manganthlak tak zet a ni," a ti a; ṭhalaite ruihhlo laka chhan chhuak turin kil tin aṭanga beih a ṭul thu a sawi.

CYMA general secre­tary Lalnuntluanga'n YMA kalphung a sawi a; khawvel hmasawn zelah YMA pawhin hma a sawn ve zel tih sawiin, "YMA ṭhatna tura ngaihtuahna séng tam tak an awm zel laiin, YMA hmalakna tawh phawt chu a do zawnga ke pên duh an awm ta zel a ni," a ti.

Lalnuntluanga chuan, YMA kalphung leh kal dan duh khawp lohna miin an sawite lo tuipui thei zel YMA hruaitu zingah pawh an awm theih thu a sawi a; YMA chu a kal zelna turah kawng ṭha zawk a zawh theih nan thuràwn petu, hma latu leh ngaihtuahna séng ṭhin hruaitu an mamawh thu leh sawisel ngam loh pawl a nih a hlauhawm thu a sawi bawk.

Thupui pahnihte hi sawiho a ni a; YMA kal­phung atana ṭha an tihte leh ruihhlo do dan tura ṭha an tihte mi eng emaw zatin an sawi. Sawitu tam ber chuan CYMA kaihhruaina hnuaiah kawng hrang hranga ruihhlo dotu tur siam ṭha an ti a, bawhzui zel dan tur chu Central YMA kutah an dah a ni.