Chuhvel leh Saikhawthlir khawtlangin Bairabi-Zamuang kawng dan an tintuah

Chuhvel leh Saikhawthlir khuaa VC leh YMA branch-te chuan thuchhuah siamin, Bairabi leh Zamuang inkar kawngpuia lirthei tlante phurh rih theih záwng thuneitute'n August 9, Thawhlehni ral hmaa an bithliah loh chuan lirthei lian tlân thei lo turin hma an lâk dawn thu an puang.

Khaw pahnih VC leh YMA-te chuan, kumin fûr chhung bika hman tur, Bairabi-Zamuang kawnga lirthei rit phurte phurh rih záwng (load limit) siam turin June 16, 2022 khan Mamit DC hnenah ngenna an thlen thu leh, July 27 khan PWD Executive Engineer, Kawrthah pawhin PWD Seperintending Engineer (Western Circle) hnenah excel load limit siam a ngaihzia a thlen bawk tih an tarlang.

VC leh YMA ngenna leh PWD EE thu thlenin tun thlenga awmzia a neih loh avangin hma an lak mai a ngaih thu an tarlang a, "Bairabi-Zamuang kawng hi single lane, rural village link road chauh a ni a, siam zawh hlim ni mah se, tunah hian hmun ṭhenkhat lai chu a chhe leh hle tawh a, ruah a sur chuan eng motor pawh an táng a ni. Khualzin leh ni tin mamawh phurtute tan tihngaihna a váng hle a, emergency-a damlo phurh pawhin inbànlek a ngai tawh a ni," an ti.

Chuhvel leh Saikhawthlir khawtlang chuan, Mizoramin balu a mamawh tih an hriat rualin, tunah chuan fûr a nih avangin lirthei leh mihring him zawk nan phurh theih zat (load limit) siam ngei a ṭul thu an tarlang a, "Harsatna siam duh lo hle mai ila, kan kawng chhiat avanga khawtlangin harsatna kan tawhte min hriatthiampui turin kan ngen a ni," an ti a; fûr chhung chuan balu phurh chungchangah insûm turin mipui an ngen bawk.

Khaw pahnihte hian kawngpuia lirthei tlânte phurh rih theih zawng thuneitute'n August 9, 2022 ral hmaa an bithliah loh chuan Bairabi leh Zamuang inkar kawngpuiah lirthei lian tlân thei lo turin hma an lâk dawn thu an puang a ni.