LESDE-in award dawn an lawm

Labour, Employment, Skill Development and Entrepreneurship (LESDE) department chuan August 5, 2022 khan Industrial Training Institute (ITI) auditorium-ah 'Government Sector Initiative in Skill Development' award an dawn an lawm a, LESDE minister Lalchhandama Ralte-in a hmanpui.

Lalchhandama Ralte chuan, thiamthil tihhmasawn (skill development)-a an thawh ṭhat avanga India rama ber nihna lawmman an dawng thei chu ropui a tih thu sawiin, "ITI aṭanga zir chhuak tam takte'n Mizoramah hlawhtlinnna hrang hrang an hmu a, Mizoram economy ṭhannaah an thawh hlâwk hle," a ti a; sorkarin ITI mamawh leh hmunhma tihchangtlunna tur cheng nuai 77 a pe chhuak tih a sawi.

Minimum wages rate ennawn a nih thu sawiin Lalchhandama chuan, "Mawhphurtute'n uluk taka ruahmanna an siam hnuah minimum wages rate thar peih a ni a, Cabinet ngaihtuah turin ruahman mek a ni," a ti.

Thusawitu dang, Man Power Development Board vice chairman Zothantluanga, MLA chuan Mizo ṭhalaite rilruah thawk loa chhungte chawmhlawm nih hrehawm tihna rilru a piang nia sawiin, "Eizawnna hmu turin thiamna skill an mamawh tih an hria a, ITI-a zir duh an pung nasa," a ti a, ITI-in admit sen loh zirlai an hmuh thu a sawi.

Award lawmna inkhawm hi LESDE secretary Lalramsanga Sailo-in a kaihruai a, LESDE director K Lalhmingliana bakah mi pawimawh dangte an tel.