Hunthar Vengah NH kawngpui a tlahniam

Kar hmasa lama ruahsur avangin Hunthar Venga NH kawngpui, tun hmaa tlahniam ṭhin chhakah Inrinni khan kawngpui a tlahniam leh a, chhuk leh chho zawnga tlân lirtheite inkal chhâwktir a ni.

Thu dawn danin, kawngpui tlahniam hi tun hmaa lei tlahniam ṭhin chhak deuh, Singson Filling Station thlang lawkah a ni a, ft. hnih vela a tlakhniam avangin chhuk leh chho zawnga lirthei tlânte a ruala tlân theih a ni lo. Kawng tlahniam hi Inrinni khan bialtu MLA C Lalmuanpuia'n a tlawh a ni.

Tun hma aṭanga lei tlahniam ṭhin pawh tun hnaia ruahsur avangin a che deuh reng a, PWD-in an hnawh khah zel avangin harsatna lutuk a awm lo.

August 5, Zirtawpni zan khan Bawngkawn leh Ṭhuampui inkar NH kawngpui chu a chhak lama leiminin a hnawh a, Inrinni chhûn khan lirthei kal theiha thenfai a ni. August 6, Inrinni zing khan Bawngkawn leh Durtlang inkar kawngpui pawh kawng chhak lam minin a hnawh ping a; kawng hi BRTF enkawl ni mah se, PWD, Aizawl Road North Division-in chhun dar 12 velah lirthei tlân tlang theihin an thianfai a ni.