Tlawng leh Mat luiah ruang zawng

August 6, Inrinni chhun dar 11-12 inkar vel khan Serchhip leh Thenzawl inkara Mat luiah Hmangaihzuala (15) , Thenzawl Vengchhak a tla a, khawtlangin zawng nghalin, nimin tlai thleng khan hmuh a la ni lo.

Thu dawn danin, Hmangaihzuala leh a ṭhiante mi paruk chu Mat luia chêng turin an kal a, lui kânna suspension bridge bulah lui dài kài an tumnaah Hmangaihzuala chu chesualin tuiah a tla a ni.

August 2, Thawhlehni zan dar 6:30 vela Sihhmui leh Lengpui inkar Tlawng luia car tlaa chuang zinga la hmuh loh C Lalfakzuala leh Malsawmkima te chu hnatlangin zawn chhunzawm zel a ni a, nimin tlai thleng khan hmuh an la ni lo.

Mi pahnihte zawnnaah hian Aizawla veng hrang hrang leh khaw hrang hranga mite an thawk chhuak a, chhun zan zawma zawn niin, ni nga leh zan ruk chhung zawn a ni tawh. Ruang zawnnaa hnatlangte hi ram hruaitu minister leh MLA-te'n an tlawh ṭhin a ni.

MHIP hruaitute chuan Inrinni khan an president Ngurmawii Sailo hoin lirthei chetsualna avanga Tlawng luia tla zawngtu Sihhmui kai, Sairang balu kai leh Buichali leia duty mekte an tlawh a, Rs 10,000 an hlan.

Ngurmawii Sailo chuan tlawmngaia duty-te chungah lawmthu sawiin, "Vanduaithlak taka he lai hmuna accident tawk tate ruang zawn chhunzawma duty - Central YMA, YMA branch hrang hrang te, khawtlang nu leh pa, nula tlangvalte chungah MHIP chu kan lawm takzet a ni. Ṭhenkhatin Mizote tlawmngaihna dal tawh anga an sawi ṭhin hi thudik lo a ni," a ti.