CWG gold medalist hmuak dawn

Commonwealth Games 2022-a ritchàwi (weightlifting)-a gold medal latu Jeremy Lalrinnunga chu vawiin hian Lengpui Airport-ah a rawn thleng dawn a, Mizoram sorkar leh sport association hruaitute'n Lengpui Airport-ah an lo hmuak dawn.

Sorkar thuchhuah tarlan danin, Jeremy Lalrinnunga pual hian Lengpuiah chawhnu dar 2:25 aṭangin lawmna inkhawm buatsaih a ni dawn a, chawhnu dar 3-ah Airport aṭangin Aizawl panpui a ni ang.

Aizawl khawpui chhung fanpui a ni dawn a; Hunthar Veng - Bawngkawn - Ramhlun - Zarkawt - Treasury Square - Sikulpuikawn - Khatla - Temple Square leh an veng, Ainawn Veng panna kawngpuiah kalpui a ni ang. Jeremy Lalrinnunga pual hian Ainawn Veng chuan inkhawm an buatsaih dawn bawk.