Minister-in zirlai lawmna a hmanpui

Minister Lalchamliana chuan August 6, Inrinni khan Tuichangral Zirlai Pawl (TCZP)-in Chanmari YMA Hall-a freshers social leh zirlai ti ṭhate chawimawina hun an buatsaih a hmanpui.

Lalchamliana chuan, zirlaite chu anmahni, chhungkua leh khawtlangah a ṭha zawnga danglamna thlentu an nih theih nan an rilru siam ṭhar turin a chah a, "Zirna hi mi puitlinga min siamtu, khawvela kan dam khaw chhuah theihna tura kawng min kawhhmuhtu a ni a, thiamna a san poh leh ramin hma a sawn ṭhin," a ti a; thiamna an neih hmanga mahni kea ding thei turin a fuih.

Inkhawmah hian kum 2021 leh 2022 chhunga pawl 10 aṭanga master degree inkara hlawhtlingte hnenah lawmpuina an hlan a, mi hmingṭhate chawimawina an hlan bawk.

Tuichangral huam chhungah hian khaw 14 - Bâwktlang, Biate, Chekâwn, East Lungdar, Hmunzawl, Khawlailung, Léng, Lungchhuan, Lungkawlh, Mualchéng, North Vanlaiphai, Pilêr, Sailulâk leh Sialsír khuate a awm a ni.