Lunglei-Tlabung kawng chhia vangin Tlabungin lungawi lohna lantir an tum

Tlabung leh Lunglei inkar kawngpui, NH-302 chhe zual laite thawm ṭha thuai tura kawng siamtute an intiam hnuah, nimin thleng khan lirthei tana tlan hleih theih lohin a la chhia a; hei vang hian Tlabunga lirthei neitute inzawmkhawmna pawl chuan August 10, Nilaini aṭangin lungawi lohna lantir an tum.

Tlabunga lirthei pawl panga intèl khawmna, Tlabung Commercial Vehicle Joint Action Committee hruaitute chu August 6, Inrinni zan khan an ṭhukhawm a; NH-302 chhe zual lai thawm ṭhat hna thawh chak tâwk loh vanga harsatna an tawhte leh hmalak dan tur an rel a ni.

Ṭhutkhawma telte chuan, hun rei lo tê chhunga kawng chhe zual lai thawm ṭha tura contractor-te intiamna tihhlawhtlin a ni lo chu pawi an tih thu te, hmun ṭhenkhatah chuan a hma zawng aia lirtheia zawh a harsat zawk thute an sawi.

NH-302 kawngpui dinhmun ngaihtuahin, lirthei tan tlàn ngamna chi-ah an ngai lo a; kawng siamtute na zawka nawr ṭula an hriat avangin, August 10, 2022 aṭangin NH-302 chu tiam chin awm loa zawh tawh rih loh an rél a ni.

Lunglei-Tlabung kawnga tlan tawh rih loh an rèl bakah hian, kawngpui kaltlanga Tlabung lam pan tur leh Tlabung aṭanga hmun dang pana lirthei kal turte pawh rîkrum thil leh mamawh zualna vanga tlân ngai tih loh chu dan an rél bawk.

Hetih lai hian, Lunglei bawrhsap Kulothungan A chuan, kawngpui chhia vanga lirthei neitute'n harsatna an tawh chungchang leh hmalak zui an tum dan chungchangah, sorkar official te, kawng siamtute leh lirthei neitute vawiin hian ṭhutkhawmpui a tum nia thu dawn a ni.

Tlabung-Lunglei NH-302 zauh leh siam hna hi SRK Construction Pvt. Ltd.-in an thawk a, National Highways and Infrastructure Development Corporation (NHIDCL)-in an enkawl a ni.