Hripui vei enkawl lai mi 1,175 an awm

Mizoramah Covid-19 vei August 5, Zirtawpni khan mi 181 hmuh chhuah a ni a, August 6, Inrinni khan mi 148 hmuh a ni bawk. Nimin leh Inrinni khan hripui vei dam tawh mi 256 chhuahtir an ni a, Covid-19 vanga thi an awm lo. Nimin tlai khan hripui vei enkawl lai mi 1,175 an awm.

August 5-a hripui vei hmuh thar mi 181-te chu mipa 85 leh hmeichhia 96 an ni a; rapid antigen test hmanga hmuh vek niin, positivity rate 26.16% a ni.

Inrinnia Covid-19 positive hmuh thar mi 148-te chu mipa 72 leh hmeichhia 76 an ni a, ZMC laboratory-a hmuh chhuah mi pakhat leh RAT hmanga hmuh 147 niin, positivity rate 33.71% a tling.

Nimin khan hripui vei dam tawh mi 111 chhuahtir an ni a, August 6, Inrinni khan mi 145 chhuahtir an ni bawk.

IDSP record angin, Mizoramah Covid-19 vei 2,34,080 hmuh chhuah a ni tawh a, mipa 1,09,016 leh hmeichhia 1,25,064 an ni a, mipa aiin hmeichhia 16,048-in an tam zawk. Nimin tlai dar 5 thleng khan mi 2,32,194 (99.19%) chhuahtir an ni tawh a, mi 711 (0.30%) thi tawhin, enkawl mek mi 1,175 (0.51%) an awm.

Kum 2011 chhiarpui angin, Covid-19 vei hmuh tawh 2,34,080 chu state mipui zat aṭangin 21.33% a tling a; mi 1,000 zelah positive 213 an awm tawh ang a ni a, hripui vangin mi 1,00,000 zelah mi 64 an thi tawh ang a ni.