KHAWTHLIR

Thisen pe
August 6, Inrinni khan Aizawl City PYD (NEI) ruahman angin Upper Republic Bial, Zemabawk North Bial, Hunthar Bial leh Tlangnuam Bial PYD-te'n Civil Hospital, Aizawl Blood Bank-ah thisen unit 79 an pe a, petute mipa 67 leh hmeichhia 12 an ni. Nursery Veng Branch YMA-in silver jubilee pualin thisen pek an huaihawt a, mipa 55 leh hmeichhia pasarihte'n Civil Hospital tan unit 62 an pe. ṬKP, Mission Vengthlang Bial pawhin BCM New Secretariat Complex kohhran hall-ah Synod Hospital tan thisen unit 38 an pe a, petute mipa 30 leh hmeichhia pariat an ni.

Tuizem sem
AMC Ward-VIII councillor Christina Roluahpuii Sailo chuan a ward chhunga chhungkaw 80 hnenah AMC bul tuma lei tuizem, tui litre 500 dawng Inrinni khan a sem. Christina-i chuan, tuizem dawng tur àwm takin an dawn theihna turin ward committee kaltlangin a dawng tur thlan a nih thu a sawi a, "Mamawhtute'n tuizem an dawn theihna atana ruahmanma siamtu mayor Pu Lalrinenga Sailo chungah lawmthu ka sawi a ni," a ti.

Hmalakna thlir lêt
Mamit bawrhsap Lalnunhlua kaihhruaiin August 5, 2022 khan Aspirational District hnuaia a kaihhnawih department hrang hrangte'n an hmalak tawhte an thlir lêt. He hunah hian NITI Aayog-in aspirational district inelna tehfung/key performance indicator thar a siamte zirho a ni a, hmasawnna tur leh delta ranking sang zawk nei thei tura hmalak dan turte sawiho a ni bawk.

Naupang rûkbo do dan tur sawiho
National Commission for Protection of Child Rights te, Mizoram State Commission for Protection of Child Rights leh Lawngtlai DC pisate chuan August 6, Inrinni khan Lawngtlai DC conference hall-ah additional DC James Miahlung kaihhruaiin naupang rûkbo leh hralh hmanga sumdawnna (child trafficking) do dan tur zirhona an buatsaih. A kaihhnawih sorkar official-te leh pawl hruaitute an tel a; additional SP C Lalruatkima leh NCPCR consultant Anshu Sharma ten thil pawimawhte an zirtir a ni.