State pawn aṭangin an rawn haw ṭan

India hmarchhak state pali - Assam, Manipur, Meghalaya leh Tripura-a Mizo tangkhangte chu sorkarin haw a phal tak avangin nimin aṭang khan an rawn haw ṭan a, mi ṭhahnem tak Mizoramah an rawn lut tawh.

Thu dawn danin, Manipur-ah Mizoram mi tangkhang inhriattir mi 318 an awm a, chu'ng zinga mi 150 vel chu Mizoram sorkar leh Manipur Group YMA-te hmalaknain lirthei 20 vel hmangin nimin zing dar 9:30 khan Lamka YMA Complex, Churachandpur aṭangin Mizoram panin an chhuak a ni.

Manipur aṭanga haw turte hian chawhnu lam khan Mizoram an lut a, state ramri, Khawkâwn rama Tuivai lui bulah Ngopa SDO(Civil), Saitual DSP leh medical team doctor panga leh thawktu dangte, Khawkawn leh NE Khawdungsei task force duty-te'n an lo dawngsawng.

Khawkâwn bâkah hian, state páwn aṭanga rawn hawte lo endik turin Vairengte, Bairabi leh Kanhmunahte screening point siam niin, Nilaini khan State Referral Hospital-a doctor leh thawktu dang eng emaw zat dah belh a ni a; rawn hawte chu uluk taka enfiah tur a nih bakah, an chuanna lirtheite pawh phuh thianghlim vek tura ruahman a ni. Hawte chu an inah haw tlang loin, an awmna district-a sorkar siam quarantine facility-ah ni 14 chhung khung an ni ang.

Hetih lai hian, Kolasib DC chuan thuchhuah siamin, hmarchhak state palia Mizo tangkhang, Mizorama haw turte Vairengte an thlen hma darkar khat leh an awmna tur hmuna kaltir vek an nih hma chuan Vairengte checkgate leh a chhehvel (Vairengte khaw chhung lam metre 200)-ah kal khap a nih thu a puang. Ṭul lo leh tih tur nei loa kal phal lohna hmuna kalte chu quarantine facility-ah dah hran an nih tur thu a tarlang bawk.

Mizoram pawn aṭanga lo hawte hi pawisa nei chu kal man mahni intum tur a ni a, kal man nei lote chu sorkarin a pui thei ang.