Mizo Covid-19 kai belh awm lo
Mumbai Mizoram House-a awm mek Mizo zingah Covid-19 vei mekte ni lo zawng swab sample endik result chu nimin zing khan a chhuak a, an vaiin Covid-19 an kai lo. Hetih lai hian, Mizoram House-a awm Covid-19 kai pahnih damdawi-ina enkawlte chu endik nawnnaah an vei tawh loh avangin April 29, Nilaini zan khan damdawi-in aṭanga chhuahtir an ni.
Mumbai Mizoram House-a awm Mizo pasarih leh hnam dang pakhat chu Covid-19 an kai tih hmuh chhuah a ni a; chu'ng zinga panga chuan an vei tawh lo tih fiah a ni leh tawh a, damdawi-in aṭangin an chhuak tawh hlawm. Mizo pahnih leh hnam dang pakhat chu damdawi-inah enkawl mek an ni a, ngaihtuahawm an ni lo.
Hetih lai hian, Mizoram House-a awm endik tawh, Covid-19 kai lote chu an sample test nawn vek a ni tawh a, an vaiin an vei lo tih finfiah a ni.