Mizoramah Union Sports Minister MFA ground-ah football academy din a ni ang - Goel

Union minister of state for Youth Affairs and Sports Vijay Goel chuan nimin khan Mizoram a lo thleng. Minister chuan, Mizoramah football an chawi san zel dawn thu sawiin, chu chuan India ramah football a tihhmasawn dawn thu a sawi a; Sairang Dinthara MFA khelmual siam mekah football academy din a nih tur thu a sawi bawk.

Youth Affairs and Sports Minister hian nimin chhun khan Lengpui Airport a thleng a, Sports & Youth Services minister Zodintluanga'n a lo hmuak. Sihhmuia Suaka Cricket Stadium leh Sairanga Mizoram Footballl Association (MFA)-in khelmual an siam mekte a tlawh nghal a ni.

Vijay Goel chuan, Mizoramin India ram football-ah dinhmun sang ber a hauh thu sawiin, Mizorama infiamna leh football tihhmasawn zel dan tur ngaihtuaha rawn zin a nih thu a sawi a, "Mizoram sorkarin infiamna tihhmasawn turin hna a thawk ṭha em em a ni," a ti. Football-ah phei chuan India aiawh tura thlan team hrang hrangah Mizo footballer an tel zel thu a sawi.

Union Minister hnenah hian MFA-in football academy siam dan tur an lo sawipui a; hemi chungchangah hian Vijay Goel chuan, "Football academy siam hi kan duh tak zet a, he hmunah ngei hian kan siam ang, state sorkar nen kan thawk dun dawn a ni," a ti.

India ram football-a Mizoram dinhmun pawimawhzia sawiin, "Mizoramah football hi nasa takin kan chawisang ang a, chumi kaltlang chuan India ramah football kan tihmasawn dawn a ni," a ti.

Union Minister hi MFA president Lal Thanzara leh honorary secretary Lalnghinglova Hmar-te chuan tun hnaia football-a Mizoram hmasawnnate a hrilh a; Vijay Goel chuan, Mizorama a lo kal chhan chu Mizoramin India ramah football-ah a ber nihna a hauh vang a ni thu sawiin, MFA hmalakna leh hlawhtlinnate chhuanawm a tih thu a sawi.

MFA honorary secretary chuan, "Tunah hian football academy changtlung tak nei lo chungin he ti zat hi India aiawha khel thei kan nei a, a zirna hmun ṭha min siamsak a nih ngat chuan India aiawh tur player tam zawk chher chhuah kan intiam a ni," tiin Union Sports minister hi academy pe turin a dil.

Vijay Goel chuan, Sairang Din­tharah football academy din a nih tur thu sawiin, "Sum kan pe nghal vek thei lo mai thei a, a tahtawlin sum kan pe ang che u. Mizoram football-in hma a sawn zel theihna tur leh,

India ramin hma a sawn zel theihna turin football academy ṭha tak din kan tum ang," a ti.

Vijay Goel hian Mizoramah hma­sawnna ruhrel din turin sorkar laipui aṭangin sum an pek tur thu a sawi.

Union Minister hi Suaka Cricket Ground a ennaah chief minister Lal Thanhawla, Cricket Association of Mizoram president ni bawk hoin an lo dawngsawng a; Sairanga MFA khelmual a tlawhnaah MFA president Lal Thanzara hoin MFA hruaitute'n an lo dawngsawng.

Minister-te hi parliamentary secretary (SYS) Hming­dailova Khiangte, SYS depart­ment leh Mizoram State Sports Coun­cil hotu-te'n an ṭawiawm a ni.

Vijay Goel hian nimin vek khan Sports Authority of India (SAI) com­plex, Mission Vengthlanga mi a tlawh a; vawiinah Lammualah Mission XI Million Football Festival a hmanpui ang.