VAT pe tam firm 40 zingah Mizo firm pali chiah a tel

Mizorama hmasawnna hna chi hrang hrang thawktu company leh firm zingah kum hnih chhunga value added tax (VAT) pe tam zual 40 zingah Mizo company/firm pali chiah a awm.

Hetih lai hian, Goods and Service Tax (GST) hman a nih hunah Mizoram VAT Act hnuaia chhiah âwl theihna Section 47 chu hman zel a ni dawn.

Vanglaini-in RTI Act hmanga a zawhna Taxation department-in an chhan danin, kum 2015-16 leh 2016-17 chhung khan Mizorama hmasawnna hna thawktu zinga VAT pe tam zual 40 zinga 36 chu hnam dang firm/company a ni a, Mizo firm/company pali chiah a awm.

Kum 2015-16 chhunga VAT pe tam ber chu Drupadev Deb, Sairang niin, Taxation department-ah chhiah cheng nuai 1,044 chuang an pe a; kum 2016-17 chhunga pe tam ber SSNR - Joint Venture chuan cheng nuai 500 chuang a pe thung. Mizoram sorkara VAT pe, Mizorama construction work thawkte zingah Mizo company/firm pali chiah an awm a ni.

RTI Act zawhna chhanna ṭhenkhatah hna thawktute leh an hnathawh hming felfai tak chhinchhiah a awm laiin, chhanna eng emaw zatah hnathawh hming chiang taka tarlan a awm lo.

Kum 2015-16 chhunga construction work hrang hrang thawh langsar zualte chu - ramri hung hna te, sorkar department building sak te, lei tênau thawm ṭhat te, border outpost sak hna te, New Market building sakte a ni hlawm.

Kum 2016-17 chhunga company leh firm-te'n VAT an chawinate chu SAI hostel sak te, Phullen leh Phuaibung inkar kawng siam te, Water Distribution Networks & Feeder siam hna te, KV GIS Melriat Sub-Station siam hna te, Thenzawl Auditorium sak te, NIELIT tihchangtlunna hna te, Tlabung leh Kawrpuichhuah kawng siam te, Serlui-B Hydel Project siam ṭhatna te, Mizoram University quarters sak te, Sihphira indoor hall sak leh hna dangte a ni.

Kum 2015-16 chhunga company leh firm zinga VAT pe tam zual 20-te'n VAT an chawi tlingkhawm chu Rs. 46,04,23,694 a tling a; chu'ng zingah chuan Mizo firm pahnih awmin, Lushai Engineering-in New Market Building an sak leh Mizoram leh Bangladesh inrina hung hna thawktu Rosangzuala, Chawnpuite an ni. Company/firm 18-te chu hnam dang hming vek a ni.

Kum 2016-17 chhunga company leh firm zinga chhiah pe tam zual 20-in VAT an chawi tling khawm chu Rs. 16,68,27,302 a a, chu'ng zinga 18 chu hnam dang firm an ni. Mizo firm pahnihte chu - Thenzawla Auditorium satu Zothankhuma leh Kolasib-a Taxation department building leh Treasury office leh hna ṭhenkhat thawktu CT Mawia Construction, Kolasib-te an ni.

Taxation department hotute sawi danin, July 1, 2017 aṭanga GST hman a nih hunah MVAT Act 2005-a dan ṭhenkhat chu hman zui a ni dawn tih an sawi.

MVAT-a dan hman zui tur zinga pakhat chu - chhiah âwl theihna, MVAT Act 2005 Section 47 a ni a; petrol, diesel, natural gas, zu, aviation turbine foil aṭanga chhiah lâkte leh sorkar hnathawkte chhiah pek Profession Tax pawh a tel dawn.

Profession Tax-ah hian thla khata Rs. 5,000 aia tlem hlawhte chuan chhiah an chawi lo a, thla khatah Rs. 5,000-8,000 inkar hlawhte'n kum khatah Rs. 900 an chawi a, Rs. 15,000 leh a aia tam hlawh chinin Rs. 2,500 an chawi thung.

Taxation department website-a tarlan danin, kum hnih chhunga chhiah khawnna chi hrang hrang - Profession Tax, Sales Tax (VAT+POL), Entertainment leh Entry Tax aṭangin kum 2015-16 chhung khan chhiah Rs. 2,49,76,09,344 hmuh a ni a; kum 2016-17 khan Rs. 3,13,90,64,471 hmuh a ni. Kum 2015-16 aia 2016-17 chhunga chhiah hmuh zat a tamna hi Rs. 64,14,55,127 a ni.