Congress sorkar hian CAG report hi pawm ve mai rawh se - Dr R Lalthangliana

MNF vice president Dr R Lalthangliana chuan, Congress party hotute'n CAG report ringhlel zawng leh rintlak lo ang zawngin zirtirna an thehdarh niin a sawi a, "CAG report hi Congress sorkar hian pawm ve mai rawh se," a ti.

Nimina MNF party aṭanga AMC councillor-te leh local council member-te puala SEDP chungchang inzirtirna inkhawm, Ramhlun Indoor Stadium-a neih-ah thu sawiin, R Lalthangliana chuan, "Congress Bhavan political session-ah CAG report ringhlel ang zawngin zirtirna dik lo an thehdarh a, a ṭha lo hle a ni," a ti a; CAG chu sorkar laipuiin uluk taka a duan, India ram puma state tinte sum hman dik leh dik loh uluk taka zir chiangtu an nih thu a sawi.

Dr R Lalthangliana chuan, CAG chuan dik taka an hmuh chhuah angte an report ṭhin a, thu dik lo an sawi ngai lo a, state leh union territory dangte'n CAG report an ringhlel ngai lo nia sawiin, "A ringhleltu awm chhun chu Mizoram Congress sorkar hi a ni. CAG report-a NLUP sum hman dik lohna leh SSA sum lapsète kha Mizoram Congress sorkar hian insawi mawi tum phêt loin pawm ve mai rawh se," a ti.

MNF Vice President chuan, SEDP-ah Pathian an dah hmasa ber a, a dawtah ram an dah pawimawh leh tih sawiin, "SEDP sum ruahmanna hi a lian tham a, sum lo kalna tur hre sa veka kan duan a ni. SEDP chu NLUP anga sem satliah ngawt a ni ve lo, chhung tinin kan din khawchhuah theih ngeina tura mamawh tawk ang zela inchhawmdawlna a ni," a ti a; MNF party a sorkar chuan Manpower Development Department an din dawn thu leh SEDP sum bik khawihtu tur Mizoram Development Bank an din dawn thu a sawi bawk.