Zirlai 1,39,259 chawchhun pe

Sorkar kum kal mek, 2017-18-ah Mizoramah zirlai naupang chawchhun (Midday meal) pek mek zirlai 1,39,259 an awm. Chawchhun hi elementary school-ah chauh pek a ni.

Thu dawn danin, zirlai naupang chawchhun hi primary school 1,455 leh middle school 1,093-ah pek a ni a; zirlaite chaw chhumsaktu (cook) mi 5,071 an awm.

Chawchhun hi sikul kai ní apiangin khaihlak loa sem tur a ni a, primary school-ah zirlai pakhat tan buhfai gram 100 leh Rs. 4.92 ruahman niin, middle school zirlai pakhat tan buhfai gram 150 leh Rs. 6.26 ruahman a ni.

Zirlaite chawchhun tur chu a thianghlim leh thianghlim loh leh, chakna a pai dante enfiah vek hnua pek chauh tur a ni a; Mizoram district hrang hrang chawchhun atana buhfai pek chhuahte chu RIPANS-ah endik atan thawn hmasak ṭhin a ni.