KHAWTHLIR

Zuangtui Biak-in rauhsan
Aizawla Zuangtui Presbyterian Kohhran biak-in leh kohhran sikul dinna lei a khîk avangin biak-in leh sikul hi rauhsan a ni. Zuangtui YMA president RL Zoramthanga sawi danin, biak-in dinna hi kum 1993 vel aṭangin nasa vak loin a che ṭan tawh a, tun hnaia ruahsûr nasaah a chet belh avangin biak-in chhuat leh bang a khî a ni. Biak-in leh sikul chu Aizawl District Disaster Management Authority lamin luah zui zel ngam loh nia an hriat avangin June 24, Inrinni khan biak-in leh sikul bungruate chu an thiar chhuak a ni.

Free clinic
St. Paul's High School-a kum 1991-a pawl 10 zirte chuan, nimin khan Aizawl Hospital & Research Centre-ah a thlawna inentirna an buatsaih a, mi 100 chuangte hrilselna dinhmun enfiahin, a thlawn-in damdawi an pe. Mit zai ngaite a thlawnin an zaisak dawn bawk a ni.

XI Million festival
Vawiin chawhma dar 10:45 aṭang hian sorkar laipuiin football chawi larna programme a siam, Mission XI Million Festival chu Lammualah buatsaih a ni dawn. He hun hi Union minister of state for Youth Affairs and Sports Vijay Goel-a'n a hmanpui ang.

Kawng la tlang lo
Aizawl-Lunglei World Bank kawngpui, June 23, 2017 zan dar 9 vela Ṭhiak khaw daia lei minin a hnawh pin chu nimin thleng khan lirthei kaltlang theiha thenfai a la ni lo nia thu dawn a ni. Kawng ping hi Ṭhiak khaw chhung aṭangin hêl theih a ni a; a hêlnaah hian MMV rit phur lo leh LMV chinte tlan phal a nih thu, Ṭhiak YMA hruaitute chuan an tarlang.