KHAWTHLIR

AH&Vety joint director Dr Lalchungnunga Pudaite leh Vety doctor Dr B Zonghinga chuan chinghnia chêt vanga harsatna tâwk mek Samthang Zopui Sevulh Association-te'n sial an vulh kawnga harsatna an tawh chu April 29, 2020 khan a hmunah an enfiah. Thîrhrui hlíng nei (barbed wire) hlûm 50, chi ip 10, rain suit paruk leh search light panga an pek bakah, sial an seh hlum neitute pawisa an hlân. Samthangah hian sial vulh chhungkua 45 awmin, sial 350 vel an vulh a, tun hnaiah chinghniate'n sial 19 an seh hlum a ni.

Traffic SP chuan, Chal­tlanga MBSE pisa péng leh Ramhlun North-a DIET péng inkar kawng chu nimin aṭang khan siamṭhat hna thawh a nih avangin khar rih a nih thu a puang. Thupek hian kawng siam hna thawh zawh a nih hma chu a huam dawn a, hnathawk tibuai theia kawngpui sira lirthei leh bungrua dah phal a ni lo.

April 4, 2020 chawhnu lama Sairang Dinthar khuaa thlipui leh ruahpui thawkin in pahnih a tihchhiatte sak ṭhat nan bialtu MLA Zothan­tluanga chuan April 29, Nilaini khan in chung tur rangva bundle 4 ve ve a pe a; in pahnihte chu sak zawh nghal a ni.

Lunglei district ma­gistrate V Lalsangliana chuan, Mizoram chhehvelah vawk natna PRRS, ASF leh CSF a léng mek nia thu dawn a nih avangin Lunglei district-ah district dang aṭanga vawk lak luh leh vawk thawn chhuah khap a nih thu a puang. Vawk thi reng reng ṭha taka phûm vek tur leh vawk hrisel ṭha chauh talh turin mipui a hriattir bawk. Thupek hi thla hnih chhung atan a ni a, zâwm lote chu IPC Section 188 hmanga hrem theih a ni.

Covid-19 dona leh invennaa hman atan Nilaini tlai dar 4 leh nimin tlai dar 3 inkar khan mimal leh pawl 12-te'n Chief Minister's Relief Fund-ah Rs. 28,79,957 an thawh. Sum thawhtute zingah AH&Vety department thawh Rs. 3,89,866, Horticulture Officers & Staff Welfare Association thawh Rs. 8,38,776, Govt. Aizawl College-a thawktute thawh Rs. 3,21,910 leh Zoramchhana te nupa thawh Rs. 1,00,000 a tel. Covid-19 dona atana CM Relief Fund-a sum lut tawh zat chu cheng nuai 700 chuang a ni.