Inkhàrkhip laia thisen pek dan puangzar
Mizoram State Blood Transfusion Council (SBTC) chuan Covid-19 léng vanga inkhârkhip laia thisen pek dan kalphung an tichhuak a; blood donation camp buatsaih leh blood bank-a thisen pek chhunzawm theih a nih tawh thu an sawi rualin, camp buatsaihtute leh blood bank-a thawktute inhnaih loa awm (social distancing) an zâwm ngei tur a ni tih an tarlang.
SBTC chuan, Covid-19 chu thisen pek aṭanga inkai theih tih finfiahna a la awm lo tih tarlangin, "Virus family zinga mi, thâwkna lam khawih natna dang SARS leh MERS-CoV te pawh thisen dawn aṭanga kai theih loha ngaih a lo ni tawh," an ti. Hei vang hian, American Association of Blood Banks, US Food and Drugs Administration, Centre for Disease Control-te'n thisen pek leh dawn aṭangin Covid-19 inkai chhâwn hriat a la nih loh thu an puang a ni.
Hripui léng mah se damlo, thisen mamawhtu tam tak an la awm reng tih sawiin SBTC chuan, "Chuvangin, hripui lèn chhunga thisen mamawhna phuhrûk nan National Blood Transfusion Council (NBTC) chuan WHO inkaihhruaina zûlzuiin India ram pum tan inkaihhruaina dan a siam a ni," a ti.
Mizoram SBTC tarlan danin, Covid-19 lênna ram/khua aṭanga zin hawte'n ni 28 chhung thisen an pek phal a ni lo a, hri veite leh rinhlelhawmte bula awm pawh ni 28 chhung thisen an pek phal a ni lo. Covid-19 vei tawhte tan an dam aṭanga ni 28 chhungin thisen an pêk phal a ni lo bawk.
Mizoram bikah chuan, thisen pek chungchanga inkaihhruainate ṭha taka kalpui a ni tih sawiin SBTC chuan, "Tlawmngai pawl hrang hrangte leh mimalte'n ṭhahnemngai takin thisen an pe ṭhin a, a lawmawm tak zet. SBTC ngenna angin, páwl anga thisen petute pawhin vawi khatah mi tam takin pe loin social distancing ṭha taka zâwm thei turin an inpêk chhâwk a ni," an ti.
SBTC chuan local task force leh traffic duty-te'n thisen pe tura kalte tan harsatna awm loa an kaltir zel chu lawmawm an tih thu sawiin, "Kan thawhhona ṭha tak avangin blood bank tinah thisen tlâkchham nei loin kan la kal zel a ni," a ti a; district tinah AVBD-te'n thisen pe tur páwl leh mimal sáwmin, thisen pek dan tur ruahmanna an siam thu an tarlang.
Inkhàrkhip laia thisen pek dan tur
Hri lên lai hian blood donation camp leh blood bank-a thisen pekte chhunzawm reng theih a ni. Camp buatsaihtute leh blood bank staff-te'n social distancing an zâwm ngei tur a ni a, metre khat tala inhlatah awm tur. Thisen pekna khum pawh metre khat tala inhlata dah tur a ni. Thisen pekna hmunah kut silfaina tur hmanrua - tui, sahbawn, hand sanitiser, PPE-te leh bawlhhlawh báwmte a awm ngei tur a ni.
Blood bank-a thawktute leh thisen pe turte'n dam ṭhat lohna nei emaw, Covid-19 veite nena inhnimhnaite chu kal chhuak lo tura ràwn an ni.
Blood bank-a thawk doctor, laboratory technician leh nurse-te'n kutkawr an bun vek tur a ni a, mimal tin an khawih dawnin kutkawr thlak emaw, alcohol base sanitiser hmanga kut tihfai tur a ni.
Thisen petute hi mi hrisel ṭha pangngaite an nih avangin thisen pekna hmuna thawkte tan invênna hmanrua a bika siam - P2/N95 mask, PPE-te hman a ngai lo.
Donation camp nei turin hmun hla taka kal rih loh ni se, hei vang hian hri lèn lohna hmun hnaivaia awmte thisen pek uar leh zual tura inzirtir ni se.
Thisen pek laia thisen petute'n an hmeh ṭhin ball hi Covid-19 lên lai chuan hman loh tur a ni a, ball tel loa tih dan tur inzirtir tur.
Thisen petute chu hripui laka invên dan leh a kaihhnawihte hre hle tura ngaih an ni a, zawhna (blood donor questionnaire) pawh ṭha taka chhàn tur a ni. Blood bank lamin Standard Operating Procedure (SOP) tihdanglam ngai a awm chuan siam-
ṭhat tur a ni a, mipui zirtirna uar takin leaflet, poster etc. hmangin neih tur a ni.
Thisen pek kawnga hma latu Association for Voluntary Blood Donation (AVBD)-te'n nasa taka ṭan an lâk a, thisen pe thei pawl leh mimalte zawn kawngah sorkar nena ṭangkawpin hmalak ni se.
Thisen petute'n an pek zawh aṭanga ni 14 chhunga Covid-19 veia inrinhlelhna leh Covid-19 vei nena inhnimhnaihna an nei a nih chuan blood bank-ah inhriattir vat tur a ni.
Thisen pek hnua Covid-19 kai emaw, thisen dawn hnua Covid-19 kai reng reng chu HvPI of NIB-ah hriattir tur.