NH Vairengte-Sairang zauh turah Zángnadawmna a la fel thei lo

Ministry of Road Transports & Highways (MoRTH) hmalaknaa NH-06 leh NH-306 (Vairengte leh Sairang inkar) thlúr lí (four lane)-a zauh turah Land Revenue & Settlement (LRS) leh Environment, Forest & Climate Change (EFCC) department-te'n ram inchuh an neih vangin zangnadawmna tihfel theih a la ni lo.

Vanglaini thu dawn danin, LRS department chuan forest reserved chinah LSC leh pass eng emaw zat an pe a; forest reseved chin chu EFCC chuan an department ram a nih avangin forest clearance pekna man pek an phût a ni.

Hetih lai hian, zangnadawmna buaipui tura Mizoram sorkarin a ruat, competent authority for land acquisition (CALA) chuan, forest reserved area china LSC leh pass neite chu zangnadawmna dawng tur zingah a telh vek thung.

NH kawngpui enkawltu Na­tional Highways and Infra­struc­ture Development Corporation Limited (NHIDCL) chuan forest reserved atan sum sên hnua ram neitute hnena zangnadawmna pek leh chu an remti thei lo bawk.

EFCC department lam chuan, Railways-in Bairabi-Sairang rél kawng siamnaah forest reserved area-a ram neite hnena zangnadawmna an pek bakah, forest clearance atan pawisa an pek tel tho anga pe ve mai turin NHIDCL an phût a ni.

Vanglaini thu dawn danin, mi eng emaw zatte zángna­dawmna pek tur chu NHIDCL chuan CALA kutah an hlân a; mahse, zángna­dawmna leh forest clearance atana pawisa an pek kawp theih loh avangin zangnadawmna sem chhuah an la phal rih lo.

Mizoram sorkar chuan LRS department leh EFCC depart­ment ram inchuh chungchang ngaihtuah tur hian GAD an ruat a, GAD hotute chuan LRS leh EFCC department hotute koin an sawipui dawn a ni. August 4, 2022-ah ṭhutkhawm tura tih a ni a, mahse, an ṭhulh rih. Ṭhutkhawm hun atan nimin (August 8) kha ruat leh ni mah se, ṭhulh leh rih a ni bawk.

CALA-in Vairengte-Chhim­luang inkara zangnadawmna pek zat tura a thehluh chu NHIDCL chuan tam lutuka an hriat avangin an pawm thei lo tawh a; zangnadawmna chhût ṭha turin Chief Secretary leh Kolasib DC hnenah ngenna an thawn. Hemi chungchanga harsatna chu chinfel a ni tawh nia thu dawn a ni.

Vairengte leh Sairang inkar kawng four lane-a siam tura hna thawh zawh hun tura ruahman chu kum 2023 a ni a, mahse, hna thawh ṭan theih a nih tâk loh avangin hun ruatah zawh hman a ni dawn lo.