Monkeypox kai rinhlelh la awm lo
Tun hnaia khawvel hmun hrang hranga hri darh mek, monkeypox chu India ramah pawh hmuh chhuah ni tawh mah se, Mizoramah hri kai rinhlelh an la awm lo.
Vanglaini palai zawhna chhangin IDSP state nodal officer Dr Pachuau Lalmalsawma chuan, Mizoramah monkeypox vei rinhlelh an la awm loh thu a sawi a, "Rinhlelh an awm chuan Guwahati-ah sample thawn a ni ang. Monkeypox vei finfiah theihna laboratory hi India ramah hmun 15-ah a awm a, Mizoram tan chuan Guwahati-a thawn a awlsam ber," a ti a; monkeypox finfiah turin sample chi sarih vel thawn a ngaih thu a sawi.
Dr Pachuau Lalmalsawma chuan, khawvel hmun hrang hrangah monkeypox a lên mek avangin Mizoram sorkar pawh theih ang anga a inbuatsaih thu a sawi a, "Hmalak dan turah ruahmanna siam a ni a, mipuiah a theih ang angin awareness neih tum a ni," a ti.