Covid-19 do nan state budget aṭangin 1% pawh hman a ni lo - Dr Vanlalthlana

ZPM MLA Dr Vanlalthlana chuan, kum hnih chhunga Covid-19 dona atan Mizoram sorkarin a budget aṭanga 1% pawh a hman tlin loh thu leh, Lengpui Airport siamna atana tuna sum sen zat aia tlem Mizoram sorkara department 30 dáwnin budget an neih thu a sawi.

Nimina ZPM pisaa inkhawmah thu sawiin Dr Vanlalthlana chuan, Covid-19 dona atan 2020-21 khan budget aṭanga 0.30% an séng a, kum 2021-22 khan budget aṭanga 0.64% an séng thung tih a sawi a, "Covid avangin sum kan harsa tih sawi ṭhin a ni a, mahse, Covid dona atan hian state budget aṭanga chhûtin 1% pawh sorkar hian a séng lo," a ti.

Dr Vanlalthlana chuan, Covid dona atan sorkar a inséng tam an tih chu a dik lo tih sawiin, "Engati nge kan buai tâk si? Airport siamna atan sum sên a ngai a lawm. Airport siamna atana tuna sum sên zat khu sorkar department 30 dáwnin budget atana an neih phâk loh a ni," a ti a; sum siamna atan budget an hman avangin sorkar chu sumah a harsa a ni zawk tih a sawi.

Tu tute emaw intihlenna tur, Hnam Rûn mai ni lo, Hnam Rûn zuan kân theite an awm tih sawiin Vanlalthlana chuan, "Chung ho tan chuan restricted tender te, work order awm hma daiha hna inthawhtir ṭhin a nih avangin sumah kan harsa ta a ni," a ti.

ZPM MLA chuan, CSS sum a chhuak huk tur leh sum dinhmun a nghawng dan tur Assembly session liam taah ZPM MLA-te'n an zawt tawh tih sawiin, "A chhànna kan dawng lo. Nikum kum tir aṭang khan CSS sum hi sorkar hnenah a thleng a, sorkarin pe chhuak leh tur a nih laiin thil dangah a pawt péng a, a pawh pènna an dahṭhatna, K Deposit-ah an dah a, a hminga awm siin pawisa erawh khawi khawiah emaw an pawt péng a ni," a ti a; ZPM-in sorkar a kài harh zo lo a, sorkar laipuiin a rawn kuk harh ta niin a sawi.

Dr Vanlalthlana chuan, MNF sorkar hmasak laiin Mizoram chu India ramah thawh chhuah aṭanga teha leiba ngah ber a ni tih sawiin, "Leiba ngah lutuk, thawh chhuah aia tam leiba neiin min hruai tluan chhuak parh. Congress sorkar lai khan kum 10 chhungin cheng vbc. 4,700-in leibá a pung a, MNF sorkarah hian kum li chhungin cheng vbc. 4,500-in a pung dawn. Hei hi kan sum enkawltute min kalpui dan a ni," a ti.

ZPM vice president Lalthansanga pawhin thu sawiin, ZPM-in rawngbawlpui duhawm tak tur an lawm lut zel chu lawmawm a tih thu a sawi a; ZPM party-ah mi tin an len thu a sawi bawk. Nimina inkhawmah hian ZPM zawm thar mi 49 lawm luh an nih thu ZPM thuchhuah chuan a tarlang.