Inthlanpuiah kan chak ka beisei - MNF Vice President

MNF vice president Vanlalzawma chuan, MNF-a department hrang hrangin theihtawp chhuaha hma an lak zel chuan nakkuma inthlanpuiah MNF an chak chhunzawm ngei a beisei thu a sawi.

Vanlalzawma hian nimin khan Mizo Hnam Rûnah thu sawiin, MNF party mipuite chu lungrual tak leh ṭhahnemngai taka ram leh hnam tana thawk zel turin a chah a; Pathian leh Mizoram tan inpekna thar nei ṭheuh turin a chah bawk.

MNF party chuan thuchhuah siamin, Commonwealth Games 2022-a India ram aiawha tel, weightlifting-a gold medal latu Jeremy Lalrinnunga leh hockey-a bronze medal latu Lalremsiami te an chhuan thu an tarlang.

MNF chuan, Jeremy Lalrinnunga leh Lalremsiami te chu an kal zelna turah duhsakna an hlàn a, "An hlawhtlinna hi Mizo ṭhalaite tiṭhangharhtu a nih a, ṭhalai tam zawkin infiamna an luhchilh zel theih nana fuih phurtu a nih ngei kan beisei. Sorkarin sport lamah ṭan a la zel a, tuna hma a lakna hrang hrangte pawh hi a lawmawm kan ti tak zet a ni," an ti.