KHAWTHLIR

Thisen pe
Nimin khan Helen Lowry College chuan an college-ah Civil Hospital, Aizawl tan thisen unit 33 an pe a, petute mipa 29 leh hmeichhia pali an ni. ZMC Students Union pawhin ZMC kum li tlin lawm nan ZMC Blood Bank-ah thisen unit 30 an pe a, petute mipa 23 leh hmeichhia pasarih an ni.

CYMA-in lawmpui
Central YMA chuan, Commonwealth Games 2022-ah Lalremsiami Hmar telna India hockey team-in India tan bronze medal an la chu ropui an tih thu an tarlang a, "An hlawhtlinna hi thinlung takin kan lawmpui a, an kal leh zelna turah ram tan chawimawina tam zawk hlawh chhuak zel turin duhsakna kan hlân. Mizo nula chhuanawm kan nei hi chawimawi phu kan ti a, ṭhalaite cho chhuaktu ni turin kan duh," an ti. CYMA hian a hmain Jeremy Lalrinnunga lawmpuina thu an tichhuak tawh bawk.

Naupang himna chungchang zirho
Mizoram State Child Protection Society leh Champhai District Legal Services Authority chuan nimin khan Khawzawl district-a Child Welfare Committee (CWC), Juvenile Justice Board (JJB), State Juvenile Police Unit (SJPU) leh police-te pualin 'Capacity building programme & training' an buatsaih a, Khawzawl bawrhsap CC Lalchhuangkima'n a hmanpui.

Photo. Exhibition
IPR department leh Mizo Photographer’s Society chuan August 19-20, 2022 chhungin Millennium Centre-ah Photography leh Photography Gear Exhibition an buatsaih dawn a, August 14, 2022 thleng thlalak thehluh theih a ni. Thlalak chu a sawifiahna (caption/title) nen mpsaizawl12@gmail.com ah thehluh tur a ni a, watermark/logo telh loh tur.

Naupang rûkbo dona inzirtir
Azadi Ka Amrit Mahotsav pualin National Commission for Protection of Child Rights, Mizoram State Commission for Protection of Child Rights leh Siaha DC pisa chuan nimin khan naupang rûkbo leh hralh dona chungchang zirhona an buatsaih a, Siaha bawrhsap Lalsangliana'n a hmanpui. A kaihhnawih sorkar hotu te, Siaha College, Siaha HSS, ECM HSS, Don Bosco HSS leh Siaha H/S zirlaite an tel a, thil pawimawhte zirtir an ni.