Union minister G Kishan Reddy kâwm

Minister of state TJ Lalnuntluanga chuan August 5, 2022 zan khan sorkar laipuia Tourism, Culture leh DoNER minister G Kishan Reddy chu New Delhi-a a chennaah a kâwm a; Champhai Tlangsam hmun hluia Tagore Cultural Complex din tum chungchang leh thil dangte a sawipui.

TJ Lalnuntluanga chuan, Champhai Tlangsam hmun hluia Tagore Cultural Complex din tum chungchangah vawi eng emaw zat sorkar laipui an dawr tawh thu sawiin, January 17, 2022-a Tagore Cultural Complex din tum chungchang chu National Appraisal Committee-in a ngaihtuah tur thu hriattir a nih thu a sawi a; chak zawka hma laksak turin Union Minister a ngen.

G Kishan Reddy chuan, theihtawp chhuaha hmalakpui a inhuam thu leh a ṭul anga hmalak nghal a nih tur thu a lo hrilh niin sorkar thuchhuah chuan a tarlang.

Minister hi New Delhi Mizoram House-a additional resident commissioner Alexander V Chongthu, EFCC department leh Law & Judicial department hotute'n an ṭawiawm a ni.