Tuia tlate hmuh an la ni lo

August 6, Inrinni chhun dar 11-12 inkar vela Serchhip leh Thenzawl inkara Mat luia tla Hmangaihzuala (15) , Thenzawl Vengchhak chu nimin thleng khan hmuh a la ni lo. August 2, Thawhlehni zan dar 6:30 vela Sihhmui leh Lengpui inkar Tlawng luia car tlaa chuang zinga la hmuh loh C Lalfakzuala leh Malsawmkimate pawh hnatlangin zawn chhunzawm zel a ni a, nimin tlai thleng khan hmuh an la ni lo.

C Lalfakzuala leh Malsawmkimate hi naktuk hi ni sarih zawn an nihna tur a ni a, hmuh an nih loh chuan Mizo dan angin Central YMA bultumin tlai dar 3-ah an tlakna bulah a nawlpuia zawn tihtawpna hun hman a ni ang.

CYMA bultumin tuitla zawng hian branch YMA hrang hrangte a inchhawkin an thawk chhuak ṭhin a, vawiin bikah chuan Aizawl khawpui huam chhunga branch zawng zawngte hnatlanga thawk chhuak tura tih an ni. Sairang, Sairang Dinthar, Sihhmui, Hortoki, Bairabi leh khawdang ṭhenkhatte pawh tui tla zawng hian an thawk chhuak ṭhin.

Hmangaihzuala ruang zawng hian Thenzawl, Serchhip, Keiṭum, Buangpui, Zote, Kanghmun leh Sialsuk aṭangte in mi tlawmngai an thawkchhuak a ni. Thenzawl YMA-ten Mat phai, thlam remchangah an riahchilh nghal a, nimin khan Mat dung tluanin, hmun hrang hrangah lawngleng leh pum siamchawp hmangte a ruang hi dap a ni.

Mat luia tla zawng tur hian Sairang Dinthar Branch YMA member, tui thiam mi 11 chuan August 7, Pathianni zan khan Mat lui an thleng a ni.