BEFR 1875-ah ding nghet turin Mizoram sorkar aiawhte phût

Joint Action Committee on Inner Line Reserved Forest Demand chuan, Mizoram leh Assam sorkar hotute ramri chungchanga an inbiakna turah Mizoram, Mizo mipui leh páwl hrang hrangte'n ramri atana an pawm tlàn BEFR 1875-ah ding nghet tlat turin Mizoram sorkar aiawhte an phût.

JAC on ILRFD chuan thuchhuah siamin, Bengal Eastern Frontier Regulation, 1875-ah ding nghet tlat tura Mizoram sorkar an phût thu an tarlang a, Assam state chhung, Thangrama Zo hnahthlakte chu an duh dan anga Mizorama an beh theih dan tur sawipui turin Mizoram sorkar palaite an ngen tih sawiin, "Assam sorkar hian Inner Line Reserved Forest square mile 509 leh Thangramte hi Mizoram sorkar kutah rawn hlân nghal turin kan phût a ni," an ti.

JAC on ILRFD chuan, Assam sorkarin police commando battalion hmanga Mizoram an vauna leh thiam tak a Inner Line Forest chhung wildlife sanctuary-ah puang a, Mizoram an nêkna tàwpsan turin Assam an phût a ni.