Police-te pualin camping neih mek a ni

Mizoram Police chuan police leh thawktu zinga ruihhlo leh a kaihhnawiha harsatna neite tan July 21, 2022 aṭangin Detoxification and Rehabilitation Camp an buatsaih a, ni 45 chhung awh tur niin, September 5, 2022 thleng a awh dawn.

Police thuchhuah tarlan danin, camping hi sorkar laipuia Ministry of Finance hnuaia National Fund for Control of Drug Abuse aṭanga sum hmuh hmanga buatsaih a ni a, hma la turin DIG (Training) kaihhruaina hnuaiah committee din a ni.

Camping hi hmun pakuaah kalpui mek a ni a; 1st MAP, 2nd MAP, 3rd MAP, 1st IR Bn, 2nd IR Bn, 3rd IR Bn, 4th IR Bn leh Police Training School (PTS), Thenzawlahte buatsaih a ni. Police hrang hrangte chu an awmna hnaih bera camping-ah an tel a; Police unit hrang hrang aṭangin camper 338 an awm mek.

Hetih lai hian, camping buatsaihtu committee chairman LR Dingliana Sailo, DIG (Training) leh member secretary J Lalṭhafamkima, 3rd MAP commandant ten an tarlan danin, July 26, 2022-a camper awm zat chu mi 334 an ni thung.

Police thuchhuah chuan, "Camping hi Police staff ruihhloin a tihbuaite chhan chhuahna tura siam a nih angin, daily routine fel tak siamin, indoor class, physical exercise leh drill te, mental health bakah Pathian thua inkaihhruainate neihpui ṭhin a ni," a ti a; police-te tan rah duhawm tak a chhuah ngei an beisei thu sawiin, mipui thawhpuina sang ber an ngen a ni.