Champhai NGO-ten municipality chak zawka kalpui an duh

Champhai District NGO Coordination Committee-te chuan Champhai khawpui enkawl tura municipality chak zawka kalpui an duh a, a ṭul anga bawhzui an tum.

Champhai NGO-te nimina an pisa-a ṭhukhawm chuan, "Champhai khawpui enkawlna tura municipality ruahmanna chak zawka kalpui a nih theihna turin Mizoram sorkar hotute hnenah a ṭul anga bawhzui nise," an ti.

An district-a mobile phone service chhe lutuk an ngaimawh thu pawh an sawiho a, August 19, 2022-ah Champhaia tlawmngai pawl hrang hrangte nen Champhai Press Club-ah sawiho a, service provider aiawhte pawh tel ve tura sawm an rel a ni.

Champhai NGO-te chuan Champhai aṭanga Khawzawl inkar, National Highway No.6 Balaji Company-in an sial mek chu a hmunah kal a, thil nihphung enfiah relin,"Ni 27.8.2022 ah he kawngpui sial mek hi a hmunah kalchilhin leivung an paih dan leh retaining wall an siam dante uluk taka enfiah nise," an ti.

Champhai NGO-te chuan Keilungliah khuah mek, hna 95% vel zo tawh nia an sawi pawh hun remchang hmasaberah chanchinbumite nen a huhoa en nise an ti a, he hna thawk mektu SS Construction Company leh PHE department hotute nen a hun tur chu la ruahman turin an dah.

Champhai (Khankawn) - Zokhawthar kawngpui, hmun ṭhenkhata la zawh fel loh magisterial enquiry neih a nih hnu pawha vawiin thlenga bawhzui loha a awm chu ṭha lo an tiin, a hmunah kala enfiah leh nise an ti a, kawngpui hi a nihna tur anga kalpui loha a awm reng chuan Legal Court-ah PIL file tura inbuatsaih an tum a ni.

Hmunhmelṭha khuaa All India Radio Station, hun rei tawh tak aṭanga din ni tawh, a taka function loha awm chu Champhai NGO chuan pawi a tiin, hemi chungchang hi Mizoram MP pahnihte hnenah thlena, a taka function a nih theihna tura hma la turin ngen nise an ti bawk.