Mizoramah sport kan promote dawn - Union Sports Minister

Union minister of state (independent charge) for Youth Affiars and Sports minister Vijay Goel chuan, Mizoram chu infiamna ngainatna hmun a nih thu sawiin, "Chuvangin Mizoramah sport kan promote tur a ni," a ti.

Union Sports Minister hian nimin khan Aijal Club-ah Nehru Yuva Kendra Sanga­than (NYKS), National cadet Corops (NCC), National Service Scheme (NSS) leh Mizorama sport association hrang hrang hruai­tute a kâwm a; an duh leh mamawh an thlente a ngaithla. Chumi hnuah thuthar thehdarhtute a kâwm a, Mizoramah infiamna ruangám eng emaw zat din a nih tawh thu a sawi.

Mizoram a rawn tlawh chhan sawiin Vijay Goel chuan, "Infiamna lamah eng nge harsatna awmte ka hre duh. Mizoram hi sport ngainatute in ni a, chuvangin sport hi Mizoramah hian kan promote tur a ni tih kan ngaih dan a ni. Sport lama hmasawnna atan theihtawp chhuah kan duh a, mahse, pawisa vangin tih theih chin a awm ve ṭhin," a ti.

Union Sports Minister chuan, infiamna lamah Mizoramin hma a sawn hle tih sawiin, "Football-ah phei chuan Santosh Trophy leh National Games-ahte in champion bakah, India team-ah player eng emaw zat in thawh ṭhin," a ti a; infiamna lama Mizoramin hma a sawn theihna atana Mizoram Sports Minister hnathawh a fak.

Vijay Goel sawi danin, ṭhalaite theihna (talent) hâi chhuahna atan Sports Talent Search Portal siam a ni a, Portal-ah hian naupang kum 8 chinin talent an neihte an dah (upload) thei dawn a ni. Naupangte talent chu zir chian a ni ang a, talent nei ṭhate chu Sports Authorty of India-ah training tir an ni ang.

Ministry of Youth Affiars and Sports-in Olympics, Commonealth Games leh Asia Games-ah India infiammite an chêt ṭhat theihna atan ruahmanna a siam a; chu ruahmanna hnuaiah chuan infiamna lama beiseiawm mi 1,000 chu kum riat chhung, kum tin Rs. 5,00,000 pek an ni dawn.

Union Sports Minister chuan, state hrang hrangte chu sport discipline hrang hranga theihna an neih ṭhatah tihhmasawn tum an nih thu sawiin, "State sorkar pawhin infiamna lama hmasawnna atan tih tur tam tak a nei a, infrastructure ṭha dinte hi an mawhphurhna a ni. Sorkar laipui pawhin theihtawp a chhuah ang a, hmanrua leh bungraw ngaite a ngaihtuah zel ang," a ti.

Vijay Goel hi Sports & Youth Services minister Zodintluanga, parliamentary secretary (SYS) Hmingdailova Khiangte leh SYS secretary HL Rochungnunga ten an ṭawiawm a ni.

Union Youth Affairs and Sports minister Vijay Goel hian nimin chawhnu khan Mizo­ram chhuahsanin New Delhi a pan a ni.