Mizoramah pa chi thar Hmu chhuah a ni
Mizoram University-a Department of Environmental Science-a assistant professor Dr John Zothanzama leh research scholar Josiah MC Vabeikhokhei leh Zohmangaiha te chuan, Mizoramah pâ (mushroom) chi thar an hmu chhuak a; a hmingah Ganoderma Mizoramense tih an vuah.
MZUa mite'n pâ an hmuh chhuah thar chungchang hi science journal PERSOONIA (Volume 38)-ah June 20, 2017 khan tihchhuah a ni a; pâ an hmuh chhuah hi science zirna huangah chuan 'Fungi' tih a ni a, Fungi zingah chuan pa chi thar, Ganoderma Mizoramense hi Mizoram aṭanga a chi thar hmuh chhuah hmasak ber a ni.
Dr John Zothanzama chuan, pa chi thar hmuh chhuah nemnghehna turin a kalkawng a hautak nia sawiin, pâ chu nikum khan MZU campus bul, Tanhril khâma thingkunga a ṭo an lak a ni tih a sawi a; a chi thar ngei a ni tih tichiang tur leh pâ chi dang nena a danglamna nemnghet turin DNA level thlenga zir chian a nih thu a sawi.