Goel-a'n MXIM festival a hmanpui

Sorkar laipuiin India ramah football tihlârna atana programme a duan thar, Mission XI Million Festival chu nimin khan Union minister of state for Youth Affairs and Sports Vijay Goel-a'n a hmanpui.

Vijay Goel chuan, kumin October thlaa India-in Under-17 World Cup a thlen tur pualin prime minister Narendra Modi kaihhruaina hnuaiah Mission XI Million programme siam a nih thu a sawi a; Festival chu India rama football tihlârna tur hmanrua a nih thu sawiin, "India rama sikul 15,000 chuangah kalpui a ni a, zirlai nau­pang maktaduai 11 (nuai 110)-in football an khel dawn a ni," a ti.

School Education mi­nister H Rohluna chuan, Mizorama Mission XI Million Festival-a Union Minister a tel thei chu lawmawm a tih thu sawiin, Festival neihna hmun atana Mizoram thlan a ni ve chu lawm­awm a tih thu a sawi a, "Mizoram sorkarin football tihhmasawn nan nasa takin ṭan a la a, chief minister Lal Thanhawla, Sports minister Zodin­tluanga leh MFA president Lal Thanzara te hnuaiah nasa takin hma kan sawn mek a ni," a ti.

H Rohluna chuan, MXIM hnuaiah sikul 189 ziah luh a ni tih sawiin, he prog­ramme-ah hian sikul naupang pawl 5-10 zirlai­te an tel thu a sawi.

School Education Minis­ter chuan, SSA Mission, TATA Trust leh NEIDA-te nen ṭang­kawpin Mizorama sikul 60-ah football training centre siam mek a nih thu a sawi bawk.

Mission XI Million Festival hawnnaah hian Sports & Youth Services minister Zodintluanga pawhin thu a sawi a; parliamentary secretary (SYS) Hmingdailova Khiangte leh Mizoram Football Association hruaitute pawh an tel. Aizawla sikul hrang hranga zirlaite telin, football an khel a ni.

Mizo footballer lâr - S Malsawmtluanga, Jeje Lalpekhlua leh Robert Lalthlamuana te pawh an tel a; anni pathum hian Mizo naupangte football an khelhpui a ni.

MXIM atan hian sorkar laipui chuan kum 2017-18 chhung atan cheng vbc. 30 a ruahman thu, Vijay Goel chuan Lok Sabha-ah a lo sawi tawh a ni.