GST kan hlâwkpui ka beisei - Finance Minister

Finance minister Lal­sawta chuan, July 1, 2017 aṭanga hman ṭan tur, Goods and Service Tax (GST) chu Mizoramin a hlâwkpui ngei beisei a nih thu a sawi.

Mamit District Trea­sury Office building thar nimina a hawnnaah Lalsawta chuan, "India ramin kum 70 chuang kan lo hman tawh chhiah lak dan chu thlakin, chhiah lak dan thar GST hi July 1-a hman tan turin June 30 zanlaiah India President-in a tlangzarh dawn. He dan thar hi Mizoram mipui pawhin kan hlâwkpui zawk leh kan ṭhatna tur a nih beisei a ni," a ti a; a hun taka sor­kara chhiah lut tur zawng zawngte pek a nih theih tawh dawn thu a sawi.

Finance Minister chuan, Mamit Treasury-a thawkte chu office buil­ding thar a nih angin rilru thar pû a, anmahni dawrtu mipui leh sorkar department hrang hrangte hawihhhâwm taka lo dawngsawng ṭhin turin a chah a, "Vawiina chinfel theih reng hnate khêk loa chingfel nghal zung zung a, kan rawngbawlna hmun a ni tih hriaa theihtawp chhuah thawk turin ka duh che u a ni," a ti.

Mamit Treasury Office building hi cheng nuai 142.34 sênga sak a ni a, February 10, 2015-ah sak ṭan niin, May 30, 2016-ah sak zawh a ni.

Mamit Treasury-ah hian thawktu treasury officer pakhat, accountant pakhat, assistant treasury accountant panga, LDC pakhat, technical staff pakhat, IV grade pahnih leh muster roll pakhat an awm.