Ruihhlo Dona Ni pualin hun hmang

Khawvel puma ruihhlo hman sual leh tawlhrûk dona ni, Interna­tional Day Against Drug Abuse & Illict Trafficking pualin nimin khan Vanapa Hall-ah hun hman a ni a; Social Welfare minister PC Lalthanliana leh Health minister Lal Thanzara ten an hmanpui.

PC Lalthanliana chuan, khaw­vel pum huap ruihhlo hman sual leh tawlhruk dona ní chu Mizo­ramah hman ve ngai lo se tih chu duhthusam a ni a, mahse, hman ngai leh ṭul ber ram a ni si chu lungngaihthlak a tih thu sawiin, "Hemi kawngah hian a kaihhnawih sorkar department, tlawmngai pawlte leh kohhrante bakah, mipui awng zawngte kan ṭan rual a pawimawh tak zet a ni," a ti.

Lal Thanzara chuan, Mizoramah ruih theih thilin a tihbuai ve miah loh chhungkua kan awm ta mang lo nia sawiin, "Ruihhlo hman sual laka inven a pawimawh a, chutiang bawka ruihhlo vanga harsatna tâwk mekte mumal tak leh kawnghmang nei taka enkawl a ṭul," a ti a; Zoram mipui nuai 11 vel zingah ruihhlo ti ṭhin mi 25,000 vel an awm thu a sawi.

Ruihhlo vanga harsatna ramin a tawh mek chingfel turin ram dang mite kuta innghah chi a ni loh thu sawiin Health Minister chuan, "Dan loa ruihhlo tawlhru ṭhinte'n mimal leh khawtlang nun an tichhia a, pawikhawihna leh dan bawhchhiatna a thlen nasat thu hre rengin, heng mite lakah hian khawtlang pawh kan ṭan rual a ṭul hle," a ti.

Inkhawma tarlan danin, ruihhlo donaah rualkhai zawka hmalak a nih theih nan Social Welfare department-in state level-ah committee pahnih - Chief Minister kaihhruaina hnuaiah High Level Monitoring Committee on Substance Abuse leh Chief Sec­retary kaihhruaina hnuaiah High Powered State Coordination Committee on Substance Abuse a din a ni.

Ruihhlo hman sual vennaah enkawlna atan standardised module pahnih - Prevention Module leh Free Treatment Module chu Mizo ṭawnga siam a ni a; ruihhlo vennaa hma latute'n ṭangkai zawka an kalpui theih nan ‘Drug Demand Reduction Policy’ duan niin, Law & Judicial department leh Finance department-te a paltlang tawh a, Cabinet-in pawm tawhin, sorkar notification nghah mek a ni.

Mizorama ruihhlo hman sual ril zawng, a ziaráng leh kalphung hriat theih nan 'Baseline Survey on Extent & Pattern of Drug Use' tih chu kum 2016-17 chhung khan kalpui a ni a, July 2017-ah tlangzarh tum a ni.

International Day Against Drug Abuse & Illicit Trafficking hi khawvel pum huapin June 26-ah hman ṭhin a ni a, kumin hian he ni hi sorkar chawlh a nih avangin Mizoramah chuan nimin khan hman a ni.